BAKIDA MDB-NİN AQRAR-SƏNAYE MƏSƏLƏLƏRİ ÜZRƏ HÖKUMƏTLƏRARASI ŞURASININ İCLASI KEÇİRİLMİŞDİR
İclasdan əvvəl şura üzvləri Fəxri xiyabanda və Şəhidlər xiyabanında olmuşlar. Onlar ümummilli liderimiz Heydər Əliyevin məzarı üzərinə və “Əbədi məşəl” abidəsinin önünə əklillər qoymuşlar.
MDB ölkələri aqrar-sənaye strukturları nümayəndələrinin iştirak etdiyi iclasın keçirilməsindən məqsəd kənd təsərrüfatı məhsulları istehsalı, aqrar-sənaye biznesi və inteqrasiya məsələlərini ətraflı müzakirə etmək idi.
İclası Azərbaycan Respublikasının kənd təsərrüfatı naziri İsmət Abasov açaraq demişdir ki, bu tədbir kənd təsərrüfatı sahəsində qarşılıqlı əməkdaşlıqla bağlı məsələlərin müzakirəsi, təcrübə mübadiləsinin aparılması, gələcək planların müəyyənləşdirlməsi baxımından çox əhəmiyyətlidir. Nazir vurğulamışdır ki, ölkəmiz inteqrasiya proseslərinə üstünlük verir, aqrar sahənin rəqabətqabiliyyətliliyini artırır, hətta azad ticarət şəraitində belə onun səmərəliliyini yüksəltməyə çalışır. Xüsusilə taxılçılıq milli ərzaq təhlükəsizliyinin tərkib hissəsi sayılır. Təsadüfi deyildir ki, son zamanlar ildə 2 milyon tondan çox taxıl istehsal edilir. Hazırda aqrar sahənin mütəxəssisləri kənd təsərrüfatı bitkilərinin məhsuldarlığının artırılmasına, yeni sortların tətbiqinə ciddi diqqət yetirirlər.
Nazir aqrar sahəyə dövlət qayğısı məsələsinə də toxunmuş, 2004-2008-ci illəri əhatə edən “Azərbaycan Respublikası regionlarının sosial-iqtisadi inkişafı Dövlət Proqramı”nı, “Aqrar bölmədə idarəetmənin təkmilləşdirilməsi tədbirləri haqqında”, “Aqrar bölmədə lizinqin genişləndirilməsi sahəsində əlavə tədbirlər haqqında” Azərbaycan Respublikası Prezidentinin 2004-cü il 23 oktyabr tarixli sərəncamlarını xatırlatmışdır.
Şura üzvləri Rusiya Federasiyasının kənd təsərrüfatı naziri Aleksey Qordeyevi yekdilliklə daha bir il müddətinə Müstəqil Dövlətlər Birliyi Aqrar-Sənaye Məsələləri üzrə Hökumətlərarası Şurasının sədri seçmişlər. Ukrayna kənd təsərrüfatı nazirinin müavini Vasili Sergeyevin sözlərinə görə, bu gün Rusiya mühüm tərəfdaşdır və şurada onun sədrliyi Birliyin bütün ölkələrinin aqrar-sənaye kompleksinin bundan sonra da səmərəli inkişafına kömək edəcəkdir. A.Qordeyev əmin etmişdir ki, Hökumətlərarası Şuranın rolunun yüksəlməsinə səy göstərəcəkdir.
MDB ölkələrinin vahid taxıl və şəkər bazarlarının yaradılması, ərzaq təhlükəsizliyinin təmin olunması məsələləri, kənd təsərrüfatının ayrı-ayrı sahələri, o cümlədən üzümçülük və şərabçılıq üzrə proqram müzakirə edilmişdir. Vurğulanmışdır ki, ərzaq təhlükəsizliyi MDB ölkələri üçün başlıca məsələlərdən biri olmalıdır.
Rusiyanın kənd təsərrüfatı naziri A.Qordeyev demişdir ki, ərzaq təhlükəsizliyinin vahid konsepsiyası hazırlanmalıdır. Ölkələrimiz tərəfindən bu istiqamətdə hələ çox az iş görülmüşdür. “Bu məsələdə MDB ölkələrində bütün hakimiyyət qollarının ahəngdarlığına nail olunmayınca biz vahid aqroərzaq bazarı və iqtisadi ittifaq yarada bilməyəcəyik”, - deyə o, bəyan etmişdir.
Ukrayna kənd təsərrüfatı nazirinin müavini Vasili Sergeyev qeyd etmişdir ki, ümumi ərzaq bazarının təşkili həm də idxalın həcmini azaltmağa kömək edərdi. Onun sözlərinə görə, bu gün Ukrayna idxal etdiyi ərzağın yalnız 25 faizini MDB ölkələrindən alır, 48 faizini isə Avropa Birliyi ölkələrindən gətirməyə məcburdur.
MDB ölkələrinin ilkin ehtiyatı 2 milyon ABŞ dolları həcmində olan vahid taxıl fondunun yaradılması da təklif edilmişdir. Ekspertlərin 200 milyon dollar məbləğində qiymətləndirdikləri layihə Birlik ölkələri hökumət başçıları şurasının dekabrda nəzərdə tutulan ıclasının müzakirəsinə veriləcəkdir.
Rusiya Kənd Təsərrüfatı Elmləri Akademiyasının vitse-prezidenti İvan Uşaçevin təqdimatı ilə MDB-nin ümumi aqrar bazarının fundamental və üstün tətbiqi elmi problemləri üzrə 2005-2007-ci illər üçün elmi-texniki əməkdaşlıq proqramının layihəsi bəyənildi. Alimin sözlərinə görə, 35 milyon ABŞ dolları dəyərində olan bu proqramın reallaşması, ilk növbədə, MDB-nin sabit ümumi aqrar bazarına keçməyə, həmçinin dövlətlərin iqtisadi və ərzaq təhlükəsizliyini yüksəltməyə imkan verəcəkdir. Proqramda Birlik ölkələrinin Dünya Ticarət Təşkilatına daxil olan dövlətlərə münasibətinə dair ümumi strategiyanın işlənib hazırlanmasına, gömrük qaydalarının liberallaşdırılmasına, MDB kənd təsərrüfatı məhsullarının keyfiyyətinin dünya standartlarına yaxınlaşmasına xüsusi diqqət yetiriləcəkdir.
Aleksey Qordeyevə Beynəlxalq Üzümçülük və Şərabçılıq Akademiyası akademikinin diplomu təqdim edilmişdir.
MDB-nin Aqrar-Sənaye Məsələləri üzrə Hökumətlərarası Şurasının növbəti iclasını 2005-ci ilin ikinci yarısında Ukraynada keçirmək qərara alınmışdır.
İclasda Azərbaycan Respublikası Baş nazirinin birinci müavini Abbas Abbasov iştirak etmişdir.
Bölmənin digər xəbərləri
