Bakıda qorunan tarix-memarlıq abidəsinə qanunsuz müdaxilə qeydə alınıb
Bakı, 11 aprel, Günel Alıyeva, AZƏRTAC
Bakı şəhəri, Nəsimi rayonu, Azadlıq prospekti 41 ünvanında yerləşən 3031 inventar nömrəli yerli əhəmiyyətli tarix-memarlıq abidəsinə müdaxilə olunduğu aşkar edilib.
AZƏRTAC xəbər verir ki, Mədəniyyət Nazirliyi yanında Mədəni İrsin Qorunması, İnkişafı və Bərpası üzrə Dövlət Xidmətinin Bakı Regional İdarəsinin əməkdaşları tərəfindən abidəyə baxış keçirilən zaman tarixi tikilinin birinci mərtəbəsində qanunsuz təmir işlərinin aparıldığı müəyyən edilib. Aparılan icazəsiz təmir işləri sakinlərin də narazılığına səbəb olub.
Azərbaycanın Xalq artisti Fidan Hacıyeva jurnalistlərlə söhbəti əsnasında özünün də yaşadığı tarixi binanın dağıdılması ilə bağlı ciddi narahatlığını ifadə edib. O deyib: “Biz 2003-cü ildə burada mənzil almışıq, 2006-cı ildən isə problemlər başlayıb”.
Xalq artistinin sözlərinə görə, binanın birinci mərtəbəsində yerləşən kommersiya obyektlərinin - xüsusən də mobil telefon mağazaları və salonların sahibləri qanunsuz tikinti işləri apararaq tikiliyə ciddi ziyan vururlar: “Onlar zirzəmidən başlayıb, sonra dayaq sütunlarını dağıtmağa başlayıblar”, -deyə o əlavə edib.
Binanın vəziyyətindən narahat olan Fidan Hacıyeva Mədəniyyət Nazirliyi ilə əlaqə saxlayıb. Hadisə yerinə gələn mütəxəssislər binaya baxış keçiriblər. Bu ev memarlıq dəyərinə malikdir - XIX əsrin sonlarında yonma daşdan tikilib, dördmərtəbəlidir, onun döşəməarası tavanları və damı taxta konstruksiyalardan ibarətdir.
“Mən çox istərdim ki, tarixi abidələrimizi qoruyaq”, - deyə Xalq artisti narahatlıqla qeyd edib və ictimaiyyəti, məsul qurumları paytaxtın memarlıq irsini qorumağa çağırıb.
Jurnalistlərlə söhbəti davam etdirən Azərbaycan Mədəniyyət Nazirliyi yanında Mədəni İrsin İnkişafı və Bərpası Dövlət Xidmətinin baş məsləhətçisi Sabir Quliyev Fidan Hacıyevanın müraciəti ilə bağlı aparılan yoxlamanın nəticələri barədə danışıb.
Onun sözlərinə görə, xidmətin mütəxəssisləri Bakı regional idarəsinin rəisi Emin İbrahimovla birgə mədəni irs obyekti kimi rəsmi mühafizə olunan tarixi binaya əyani baxış keçirib. Baxış zamanı obyekt açıq olub, lakin bina sahibləri müvafiq müraciətə baxmayaraq, onun texniki pasportunu verməkdən imtina ediblər.
O, həmçinin qeyd edib ki, son vaxtlar binada cari təmir işləri aparılıb, onun izləri fasadlarda və divarlarda aydın görünür. Qeyd edək ki, “Tarixi-mədəni irsin mühafizəsi haqqında” Azərbaycan Respublikasının Qanununa əsasən, abidələrin bədii-estetik görkəminin dəyişdirilməsi, sökülməsi, habelə həmin obyektlərə təhlükə yarada bilən təmir, tikinti, texniki qulluq və digər işlərin aparılması qadağandır. Abidələr üzərində bərpa, konservasiya, təmir və digər müdaxilələr üzrə işlər yalnız müvafiq layihələr dövlət xidməti tərəfindən təsdiq edildikdən sonra aparıla bilər.
“Onu da vurğulamaq vacibdir ki, hələ 2006-cı ildə Fidan Hacıyeva Dövlət Şəhərsalma və Arxitektura Komitəsi ilə əlaqə saxlayıb, daha sonra binanın zirzəmisində qanunsuz sökülmə faktını qeydə alıb və rəsmi akt tərtib edib, sənəd müvafiq dövlət orqanlarına təqdim olunub”, - deyə o əlavə edib.
Baxış əsnasında xidmət belə qənaətə gəlib ki, obyekt sahiblərindən təcili olaraq otaqların texniki pasportlarını təqdim etmələri tələb olunur. Yalnız bundan sonra mütəxəssislər rəsmi rəy verə və memarlıq irsinin qorunması üçün lazımi tədbirlər görə biləcəklər.
Abidələrin mühafizəsi haqqında Azərbaycan Respublikası qanunvericiliyinin pozulması cinayət, inzibati, intizam və mülki məsuliyyət yaradır.
Bölmənin digər xəbərləri
