AZƏRTAC xəbər verir ki, fevralın 26-da “Bakı Sərnişin Nəqliyyatı” MMC-də paytaxtda fəaliyyət göstərən marşrut xətlərində irihəcmli avtobusların tətbiqi ilə əlaqədar mətbuat konfransı keçirilmişdir.

Əvvəlcə Xocalı soyqırımında həlak olmuş soydaşlarımızın xatirəsi bir dəqiqəlik sükutla anılmışdır.

Sonra qurumun rəisi Ceyhun Abdullayev bir il əvvəl yaradılmış “Bakı Sərnişin Nəqliyyatı” MMC-nin fəaliyyəti haqqında məlumat vermişdir. Respublikamızın son illər sürətli inkişaf xəttinə çıxdığını, regionun lider dövlətinə çevrildiyini vurğulayan C.Abdullayev Bakının avtobus marşrut xətlərində sərnişinlərə göstərilən xidmətin şəhərin inkişaf səviyyəsinə uyğunlaşdırılmasının vacibliyini bildirmişdir. Bu məqsədlə MMC tərəfindən atılan addımlar, həyata keçirilən layihələr barədə ətraflı məlumat verilmişdir. Qeyd edilmişdir ki, sürətlə inkişaf edən və gözəlləşən paytaxtın marşrut xətlərində müasir səviyyəli avtobuslardan istifadə məqsədi ilə hələ 2006-cı ilin noyabrında bu xətlərin sahibləri Nəqliyyat Nazirliyinə dəvət edilmiş və onlara 2007-ci ilin sonunadək bu istiqamətdə konkret işlərin görülməsi barədə tapşırıqlar verilmişdir. Lakin buna baxmayaraq, yalnız bir neçə şirkət tərəfindən 400-dək irihəcmli avtobus gətirilərək sərnişinlərin istifadəsinə verilmişdir. Hazırda şəhərdaxili və şəhərətrafı marşrut xətlərində 3600-dən çox kiçikhəcmli avtobus işləyir ki, onlar da tıxacların yaranmasına səbəb olur. İri və ortahəcmli avtobuslar tətbiq edildiyi təqdirdə isə bu rəqəm 2600-dək azalacaqdır. Bu da öz növbəsində şəhərdəki nəqliyyat vasitələrinin sərbəst hərəkətinə müsbət təsir edəcək, sərnişinlərə göstərilən xidmətin səviyyəsini yüksəldəcəkdir.

Şəhər ictimai nəqliyyatında xidmət səviyyəsinin yüksəldilməsi üçün vətəndaşların yardımına da kəskin ehtiyac duyulduğu qeyd edilmişdir. Belə ki, əksər sərnişinlərin avtobusları dayanacaqlardan kənarda, xüsusən də işıqforların altında saxlaması tıxacların yaranmasına, həmçinin qəza vəziyyətlərinin yaranmasına səbəb olur. Buna görə də vətəndaşların ictimai nəqliyyatdan istifadə qaydalarına ciddi surətdə riayət etmələri zəruridir.

Mətbuat konfransında fevralın 10-dan martın 10-dək Bakı Dövlət Yol Polisi İdarəsi ilə birlikdə keçirilən “Hərəkətin Təhlükəsizliyi Aylığı”nın müsbət nəticələri haqqında məlumat verilmişdir. Aylıq ərzində həm sürücülər, həm də sərnişinlər tərəfindən qaydaların pozulması hallarının xeyli azaldığı diqqətə çatdırılmışdır.

Azərbaycan paytaxtında dünyada ən müasir “Nəqliyyatın İntellektual İdarəetmə Sistemi”nin qurulmasına başlanıldığı, bu sistemin dispetçer mərkəzinin inşası üçün torpaq sahəsinin ayrıldığı qeyd edilmişdir. Vurğulanmışdır ki, cari ildə Bakıya gətirilməsi nəzərdə tutulan 1000-dən çox avtobus məhz bu sistem tərəfindən idarə edilmək üçün münasib avadanlıqla təchiz olunacaqdır.

######