BAKININ TANINMIŞ MEMARI İOSİF QOSLAVSKİNİN VƏFATINDAN 100 İL KEÇİR
Bir çoxları paytaxtımızı bəzəyən dəbdəbəli binaların, o cümlədən hacı Zeynalabdin Tağıyevin evinin (hazırda Azərbaycan Tarixi Muzeyi), müsəlman qızlar üçün məktəbin (Milli Elmlər Akademiyasının Əlyazmalar İnstitutunun binası) müəllifinin İ.Qoslavski olmasından, yəqin ki, xəbərsizdir. Onun yaradıcılığının şah əsəri isə keçmiş şəhər Dumasının binası sayılır. İndi bu binada Bakı Şəhər İcra Hakimiyyəti yerləşir. Bu gün şəhərimizi bəzəyən bütün iri memarlıq layihələrini həmin illərdə İ.Qoslavski təsdiqləyirdi.
Sankt-Peterburqda Mülki Mühəndislər İnstitutunu “əla” qiymətlərlə bitirdikdən sonra İosif Qoslavski Bakıya gələrək, 1892-ci ildən 1904-cü ilədək şəhərin memarı vəzifəsində işləmişdir. Qoslavskinin yaradıcılığı Bakını böyük tikinti meydanına çevirmiş neft bumu ilə bir vaxta düşmüşdü. O vaxtlar Qoslavski ilə neft maqnatı və xeyriyyəçi hacı Zeynalabdin Tağıyev arasında böyük şəxsi dostluq münasibətləri yaranmışdı. Qoslavskinin layihələrini məhz hacı Zeynalabdin maliyyələşdirirdi. İstedadla kapitalın belə uğurlu vəhdəti memara özünün ən yaxşı ideyalarını həyata keçirməyə imkan verirdi. Qoslavski memarlıq tarixinə “Qafqaz Rasstrellisi” kimi daxil oldu. Cəmi 38 il ömür sürən memara yaradıcılığının zirvəsi hesab edilən və uzun illər Bakı Soveti adı ilə tanınan binanı görmək qismət olmadı. Memarların fikrincə, həmin bina Bakının ən yaxşı inzibati binası sayılır.
Bakını doğma şəhəri kimi, bakılıların sevdiyi kimi sevmiş bu böyük insanın xatirəsini ehtiramla yad etmək hər birimizin borcudur.
