Bakı, 5 may (AZƏRTAC). İnsanın gözləri ilə gördüyünə inanmağı gəlmir. İnanmağın gəlməsə də, hər halda qısa zaman kəsiyində belə bir gözəl məkana çevrilmiş bu əraziyə nəzər yetirdikcə təbiətin və insan əli ilə yaradılanın tam vəhdət təşkil edərək bir nöqtədə qovuşduğunun şahidi olursan.

Azərbaycan paytaxtının özünəməxsus memarlıq ənənələrinə yeni forma və üslub gətirən bu ünvan Xəzərin mavi suları ilə bir harmoniya yaradır desək, yəqin ki, mübaliğəyə yol vermiş olmarıq. Sanki Xəzər də bu nadir memarlıq abidəsinin ərsəyə gəlməsini səbirsizliklə gözləyirdi. Hələlik günəşin şüalarını əks etdirən, Bakının küləkləri ilə əylənən bu saray özü də tezliklə ətrafa nur saçacaqdır. O zaman isə bu yeni memarlıq ansamblı sayı on minlərlə ölçüləcək qonaqlarına insan zəkası və əməyi nəticəsində xəyalların gerçəkliyə çevrilməsini əyani şəkildə nümayiş etdirəcəkdir.

Bəli, bu gün sivil dünyanın gözü qarşısında əsrlər boyu möhtəşəm arxitektura nümunələri ilə məşhur olmuş, ta qədimdən səyyahların yol qeydlərində öz əksini tapmış Azərbaycanın zəngin memarlıq ənənələrinə yeni bir inci əlavə olunur. Bu, “Ginnesin rekordlar kitabı”na düşmüş əzəmətli Dövlət Bayrağı Meydanının yaxınlığında yerləşən ərazidə özünə “vətəndaşlıq” hüququ qazanmış “Baku Crystal Hall”dır. Bu nadir inci öz memarlıq üslubu ilə Şərq və Qərb arasında yeni əməkdaşlıq körpüsü yaradan ən mükəmməl sənət nümunəsidir desək, yəqin ki, səhv etmiş olmarıq.

Bakının modernləşməsi istiqamətində, paytaxtımızda ən müasir idman-konsert kompleksinin fəaliyyət göstərməsi məqsədilə tikilmiş bu möhtəşəm bina ilk olaraq qapılarını müasir Avropanın ən nüfuzlu musiqi yarışması olan “Eurovision-2012” mahnı müsabiqəsinə açacaqdır.

Burada yaradılanlara nəzər salarkən bir daha qəti şəkildə əmin olursan ki, Bakıda mahnı müsabiqəsinin keçirilməsi üçün təklif olunmuş üç ünvan (Heydər Əliyev adına İdman-Konsert Kompleksi, Tofiq Bəhramov adına Respublika stadionu, “Baku Crystal Hall”) arasından seçilmiş bu məkan mötəbər musiqi layihəsinin reallaşması üçün bütün tələblərə cavab verəcək ən uğurlu seçimdir.

“Baku Crystal Hall”ın tikintisinin həvalə edildiyi Almaniyanın “ALPINE Bau Deutschland AG” şirkəti işinin öhdəsindən uğurla gəlmişdir. Şirkətin bir çox ölkələrin idman obyektlərinin (Polşada futbol üzrə Avropa çempionatının keçirilməsi üçün stadionun, Münxendə “Allianz Arena”nın) inşasında möhürü vardır. Həmçinin Avstriyanın, Dubayın məşhur idman tikililərinin genişlənməsi və yenidən qurulması da bu şirkətin adı ilə bağlıdır.

Maraqlıdır ki, tikintidə əsasən yığma metal konstruksiyadan istifadə olunmuşdur. Kompleksin tezliklə ərsəyə gəlməsinin sirri isə işlərin eyni vaxtda bütün istiqamətlərdə - yer, fasad və dam örtüyündə aparılmasındadır. Bina Bakının ən güclü küləyinə belə davamlıdır. Həmçinin kompleksin təhlükəsizlik sistemində xüsusi hallarda dünya standartlarına uyğun, ən qısa müddətə evakuasiya nəzərə alınmışdır.

Binanın fasadında xüsusi materiallar üzərində yerləşdirilmiş lampaların yaradacağı çoxsaylı parlaq çalarlar və maraqlı vizual effektlər ətrafa xüsusi gözəllik bəxş edəcəkdir.

“Baku Crystal Hall”ın çox geniş meydanı vardır. Ümumilikdə 25 min nəfərlik tamaşaçı tutumu olan zalın bir hissəsini səhnə tutduğundan burada müsabiqəni 20000 nəfər izləyə biləcəkdir.

Artıq şou hazırlıqları üçün təhvil verilmiş “Baku Crystal Hall”ın binasının daxilində səhnə avadanlıqlarının quraşdırılması prosesi başa çatmaqdadır.

Quraşdırılmış kreslolar, VİP loja, sərinlik sistemi seyrçilərin bütün rahatlığını təmin edəcəkdir.

Burada “Eurovision-2012” mahnı müsabiqəsinə son hazırlıq işlərinin gedişini izləyərkən bir daha əmin olursan ki, təxminən 16 gün sonra burada həm ifaçıları, həm də tamaşaçıları möhtəşəm bir səhnə gözləyir. Modern üslubda hazırlanmış səhnə seyrçilərə üçölçülü (3D) təsir bağışlayacaqdır. Xarici mütəxəssislər və ekspertlər təsdiqləyirlər ki, mahnı müsabiqəsi tarixində belə şou hazırlıqları olmamışdır.

Səhnənin, tamaşaçı yerinin, gözləmə otağının (green-room) ən müasir avadanlıqla və texniki vasitələrlə təchizatı “Baku Crystal Hall”ın özəlliklərindəndir. Bakı şousunda 80 min işıq diodların, 2500-dən çox proyektorun istifadə olunması nəzərdə tutulur. Bu zalın gözləmə otağı əvvəlkilərdən mahiyyəti üzrə köklü surətdə fərqlənəcəkdir. Bütün istiqamətlərdə işlər əsasən layihənin şou tərəfdaşı, Almaniyanın “Brainpool GmbH” şirkəti tərəfindən həyata keçirilir. Dünya standartlarına uyğun və sonuncu nəsil avadanlıqdan istifadə isə şounun və onun efirdə görüntüsünün keyfiyyətinə çox ciddi təsir edən faktdır. “Brainpool GmbH” dünyada müxtəlif şouların hazırlanmasında və işlənməsində lider olan bir şirkətdir. Bu şirkət keçən il Düsseldorfda keçirilən 56-cı “Eurovision” yarışması zamanı üzərinə düşən vəzifəni yüksək səviyyədə yerinə yetirmişdir.

Kompleksin maraqlı hissələrindən biri də Mətbuat Mərkəzidir. İndiyədək “Eurovision” mahnı müsabiqəsində jurnalistlərin istifadəsinə verilmiş obyektlərin içində ən müasiri və həcm etibarilə (5000 kv.m) ən genişidir. Konsert zalı ilə məharətlə əlaqələndirilən bu hissə ən müasir standartlara uyğun olmaqla, maneəsiz giriş-çıxışı təmin edir. Burada 1500-dən artıq jurnalistin eyni vaxtda işləməsi üçün hər bir detal nəzərə alınmışdır. Mərkəzdə yüksək sürətli Wi-Fi sistemi quraşdırılmışdır. Ətrafdakı monitorlar vasitəsilə isə həm müsabiqə iştirakçılarının məşqlərini, həm mətbuat konfranslarını və həm də bilavasitə şouları müşahidə etmək mümkündür.

Xüsusi kabinələrdə jurnalistlər müsahibələr ala biləcəklər. Mərkəzin bir küncündə yaradılan studiyada isə televiziya müsahibələrinin çəkilişlərini həyata keçirmək mümkün olacaqdır. Məlumdur ki, “Eurovision” mahnı müsabiqəsi həm də mətbuat konfranslarının çoxluğu ilə seçilir. Bu baxımdan jurnalistlərin ixtiyarına mərkəzin daxilində veriləcək konfrans zalının həcmi 500 nəfərlikdir. Kafeteriyanın olduğu istirahət guşəsi isə jurnalistlərin rahatlığını təmin edəcəkdir.

Ənənəvi olaraq bütün iştirakçı ölkələrin jurnalistlərinin öz efirlərinə canlı bağlantıları üçün arenadan xaricdə müvafiq texnika ilə təchiz edilmiş xüsusi yer ayrılacaqdır. Jurnalistlər sifariş etdikləri saatda gəlib fonun qarşısında (təbii ki, Kristal zalın arxada görünməsi nəzərdə tutulur) stand-up edə biləcəklər.

Dünya standartlarının bütün tələblərinə ən yüksək səviyyədə cavab verən bu kompleks həm də ölkəmizin iqtisadi potensialının göstəricisidir. Yalnız Azərbaycan Prezidenti İlham Əliyevin dəqiq, aydın, uzaqgörən strategiyasının uğurlu icrası nəticəsində belə möhtəşəm layihə reallaşa bilərdi. Göründüyü kimi, reallaşdı da!

Bütün bunlardan sonra qətiyyətlə deyə bilərik ki, “Baku Crystal Hall” müasir üslubu və dizaynı ilə “Eurovision-2012” mahnı müsabiqəsini dolğunlaşdıraraq ən gözəl təəssüratları yaradacaqdır.

Gözəl Ağayeva

AZƏRTAC-ın müxbiri