Baş Prokurorluğun əməkdaşları onlayn beynəlxalq təlimdə iştirak ediblər
Bakı, 25 fevral, AZƏRTAC
Azərbaycan Respublikası Baş Prokurorluğunun əməkdaşları onlayn formatda keçirilmiş beynəlxalq təlimdə iştirak ediblər.
Baş Prokurorluğun mətbuat xidmətindən AZƏRTAC-a bildiriblər ki, Avropa Şurasının Kibercinayətkarlıq üzrə proqram ofisinin təşkilatçılığı ilə “Kibercinayətlər və elektron dəlillər sahəsində əməkdaşlıq” mövzusunda keçirilən onlayn təlimə prokurorluq, polis, ədliyyə orqanlarının və digər qurumların nümayəndələri qatılıblar.
Təlimdə kibercinayətkarlıq sahəsində beynəlxalq əməkdaşlıq, Budapeşt Konvensiyasında nəzərdə tutulan müddəalar, hüquqi yardım haqqında sorğular, onların nümunələri, formal, qeyri-formal əməkdaşlıq üsulları və digər mövzularda müzakirələr aparılıb, bu sahədə milli qanunvericilik barədə ətraflı məlumat verilib. Bununla yanaşı, təlim iştirakçıları kazus üzərində işləyib, müvafiq məruzələr hazırlayıblar.
Bu iştirak beynəlxalq ekspertlər tərəfindən yüksək qiymətləndirilib. Yekunda təlim zamanı qazanılmış biliklərin yoxlanılması məqsədilə iştirakçılar arasında yazılı sorğu keçirilib. Sorğunu uğurla tamamlayanlar sertifikatlarla təltif ediliblər.
Bölmənin digər xəbərləri
