BBVB-NİN 2003-CÜ İLDƏKİ HƏRRAC DÖVRİYYƏSİ BİRJANIN ONİLLİK FƏALİYYƏTİNDƏ ƏN YÜKSƏK GÖSTƏRİCİDİR
Birjanın informasiya-analitik şöbəsindən AZƏRTAC-ın müxbirinə bildirmişlər ki, birinci yeri Azərbaycan Beynəlxalq Bankı, sonrakı yerləri “Azəriqazbank”, “Əmrahbank”, BUSBank və “Texnikabank” tuturlar. Ötən il ərzində BBVB-nin səsli hərraclarında və elektron ticarətində 36 bank iştirak etmişdir.
ABŞ dolları üzrə BBVB-də 2003-cü ildəki ümumi ticarət həcmi 612,07 milyon dollar və ya 3,008 trilyon manat olmuşdur. Bu həcmin 71 faizi və ya 2 trilyon 129 milyard 77 milyon 397 min manatlıq əqdləri BEST elektron ticarət sistemində qeydə alınmışdır. Eyni zamanda, AURAZM və RURAZM alətləri üzrə əqdlərin həcmi ötən il müvafiq olaraq manat ekvivalentində 1,039 milyard və 5,141 milyard olmuşdur. Bununla belə, USDAZM alətləri üzrə səsli hərracların həcmi 178,913 milyon dollar və ya 878 milyard 741 milyon 387 min manat təşkil etmişdir. Orta hesablanmış birja USDAZM məzənnəsi ilin yekunlarına görə 4914, 1745 manat təşkil etmişdir, halbuki 2002-ci ilin yekunlarına görə 4860,5449 səviyyəsində olmuşdur. BBVB-nin valyuta bölməsində, ümumən 248 ticarət sessiyası keçirilmiş və 337 əqd qeydə alınmışdır. 2002-ci il ərzində isə BBVB-də banklar tərəfindən cəmi 975 əqd bağlanmışdır. 2003-cü ildə, əvvəlki il ilə müqayisədə, valyuta hərraclarının ümumi həcmi 417,3 faiz və ya 5,1 dəfədən də çox artmışdır.
BEST sistemi çərçivəsində fəaliyyət göstərən mütəşəkkil banklararası kredit bazarında 2003-cü ilin yanvar-dekabr aylarında 16 girovsuz əqd qeydə alınmışdır. Bankalar tərəfindən cəlb edilən vəsaitin həcmi girov təminatı verilmədən 12,568 milyard manata, illik faiz dərəcəsi isə, orta hesabla, 10,3-ə bərabər olmuşdur. Həmin dövrdə BBVB-nin kredit bölməsində Azərbaycan Respublikasının Milli Bankı tərəfindən mərkəzləşdirilmiş vəsaitlərin yerləşdirilməsi üzrə 40 hərrac keçirilmişdir. Bazarın bu seqmentində banklar tərəfindən cəlb edilmiş vəsaitlərin həcmi 118,700 milyard manat, hərrac kredit dərəcəsi 7 faiz, qeydə alınmış kredit əqdlərinin sayı isə 104 olmuşdur. Birjanın kredit bölməsindəki həcmlər 2002-ci il ilə müqayisədə 21 faiz artmışdır.
Beləliklə, BBVB-nın valyuta və kredit bölmələrində qeydə alınan əqdlərin ümumi həcmi 2003-cü ildə 3,145 trilyon manat təşkil etmişdir ki, bu da birjanın onillik fəaliyyəti tarixində ən yüksək dövriyyə göstəricisi sayıla bilər.
Bölmənin digər xəbərləri
