BEA: 2050-ci ilədək neft və qaza qlobal tələbat artacaq
Bakı, 12 noyabr, AZƏRTAC
Beynəlxalq Enerji Agentliyi (BEA) çərşənbə günü, noyabrın 12-də bildirib ki, qlobal neft və qaz tələbatı 2050-ci ilə qədər arta bilər və bu da təmiz yanacaqlara sürətli keçid proqnozları ilə bağlı geriləmə deməkdir. Agentlik dünyanın iqlim məqsədlərinə çatmaqda uğursuz olacağını ehtimal edir.
AZƏRTAC xəbər verir ki, BEA son illərdə ABŞ-ın təzyiqi ilə üzləşib, çünki Prezident Donald Tramp Amerika şirkətlərini neft və qaz hasilatını daha da genişləndirməyə çağırıb.
ABŞ-ın enerji katibi Kris Rayt BEA-nın ən yüksək tələbat proqnozlarını “absurd” adlandırıb. BEA üzv ölkələr tərəfindən maliyyələşdirilir və ABŞ bu prosesə ən böyük töhfə verir. Onun təhlili və məlumatları dünya miqyasında hökumətlərin və şirkətlərin enerji siyasətini formalaşdırır.
Beynəlxalq Enerji Agentliyinin çərşənbə günü dərc etdiyi illik “Dünya enerjisinin perspektivləri” adlı hesabatda mövcud siyasətlərə əsasən, neftə tələbatın əsrin ortalarına qədər gündəlik 113 milyon barelə çatacağını və bu rəqəmin 2024-cü ildəki istehlakdan təxminən 13% çox olacağını proqnozlaşdırıb.
BEA, həmçinin qlobal LNG bazarının 2024-cü ildə təxminən 560 milyard kubmetrdən 2035-ci ildə 880 milyard kubmetrə, 2050-ci ildə isə 1020 milyard kubmetrə qədər artacağını ehtimal edir.
Hesabatda bildirilir ki, bütün hallarda qlobal istiləşmə 1,5°C-ni keçəcək və xalis sıfır emissiya ssenarisində bu rəqəm yalnız karbonun təmizlənməsi texnologiyalarının tətbiqi ilə yenidən azalacaq.
Bölmənin digər xəbərləri
