BERLİNDƏ TÜRKİYƏ MƏDƏNİYYƏT GÜNLƏRİ BAŞLANMIŞDIR

22.05.2004 [20:56]
Çap et
A⁺ A^-

AZƏRTAC-ın xüsusi müxbiri xəbər verir ki, mayın 22-də Almaniyanın paytaxtı Berlində Türkiyə Cümhuriyyətinin mədəniyyət günləri başlanmışdır. Türkiyə Cümhuriyyətinin, Berlin bələdiyyəsi və senatının "Avropa Türkiyəsinin mədəni irsi" devizi altında keçirdiyi mərasimə Avropa Birliyinin 25 ölkəsindən 100 min nəfərdən artıq qonaq dəvət edilmişdir.

Festivalın məqsədi Avropa Birliyinə qəbula çalışan Türkiyənin Birliyin üzvü olan ölkələrin millətləri, xalqları ilə müxtəlif mədəniyyətlər arasında dialoq yaratmaqdır.

Festivalın təntənəli açılışı Berlinin məşhur tarixi Brandenburq darvazaları önündəki Paris meydanında keçirilmişdir. Türkiyə nümayəndə heyətinin rəhbəri çıxışında ölkəsinin Avropa Birliyinin vahid ailəsinə qoşulmağa hazır olduğunu söyləmişdir.

Açılış mərasimindən sonra Türkiyə konsert birliklərinin, folklor ansambllarının ifasında geniş mədəni proqrama start verilmışdir.