BMT-nin nümayəndəsi: Şəhər dayanıqlılığı davamlı inkişafın əsas strateji istiqamətlərindən biridir
Bakı, 20 may, AZƏRTAC
Müasir dövrdə şəhərlərin dayanıqlılığının artırılması yalnız fiziki infrastrukturun möhkəmləndirilməsi deyil, həm də idarəetmə sistemlərinin və şəhərsalma modellərinin yenidən nəzərdən keçirilməsini tələb edir.
AZƏRTAC xəbər verir ki, bu fikri Birləşmiş Millətlər Təşkilatının (BMT) Türkiyədəki rezident-əlaqələndiricisi Babatunde Ahonsi Ümumdünya Şəhərsalma Forumunun 13-cü Sessiyası (WUF13) çərçivəsində keçirilən “Şəhər zəlzələsinə hazırlığın gücləndirilməsi: Daha təhlükəsiz və daha davamlı şəhərlər üçün BMT-nin həlləri” adlı tədbirdə çıxışı zamanı səsləndirib.
O bildirib ki, son illərdə baş verən təbii fəlakətlər şəhərlərin inkişaf modelləri, idarəetmə sistemləri və şəhərsalma yanaşmaları üçün ciddi sınaq olub. “Milli və BMT səviyyəsində aparılan təhlillər göstərir ki, bu hadisələr yalnız şəhərlərin fiziki həssaslığını deyil, eyni zamanda, XXI əsrdə mövcud olan sistemlərarası qarşılıqlı asılılığı da üzə çıxarıb”, – deyə Babatunde Ahonsi vurğulayıb.
Onun sözlərinə görə, mövcud çağırışlar fonunda bərpa prosesləri gələcəyə hesablanmış dayanıqlılıq, inklüzivlik və davamlılıq prinsipləri əsasında həyata keçirilməlidir: “Bu gün əsas məsələ şəhərlərin yenidən qurulub-qurulmaması deyil, onların necə və kimlər üçün yenidən qurulmasıdır”.
Babatunde Ahonsi qeyd edib ki, Tokioda bərpa prosesi fəlakətdən əvvəlki vəziyyətə qayıdış kimi deyil, daha dayanıqlı şəhər sistemlərinə keçid üçün strateji dönüş nöqtəsi kimi qiymətləndirilib. “Bu yanaşma aşağı karbon emissiyalı və iqlim dəyişikliklərinə uyğun infrastrukturun yaradılmasını, eləcə də inklüziv sosial-iqtisadi inkişaf modellərinin tətbiqini nəzərdə tutur”, – deyə o əlavə edib.
BMT-nin nümayəndəsi vurğulayıb ki, şəhərlər risk, həssaslıq və imkanların kəsişdiyi əsas məkanlardır. “Şəhərlər əhali, iqtisadi fəaliyyət və resursları cəmləşdirməklə yanaşı, bərabərsizlik və müxtəlif risklərə məruz qalma hallarını da özündə birləşdirir. Bu səbəbdən şəhər dayanıqlılığı həm milli bərpa strategiyalarının, həm də qlobal proseslərin mərkəzində dayanmalıdır”, – deyə Babatunde Ahonsi bildirib.
Onun sözlərinə görə, şəhər dayanıqlılığına yönələn investisiyalar uzunmüddətli davamlı inkişaf baxımından xüsusi əhəmiyyət daşıyır.
Bölmənin digər xəbərləri
