BÖYÜK BRİTANİYADA “ARAZ AZƏRBAYCAN” QƏZETİNƏŞRƏ BAŞLAMIŞDIR

05.10.2006 [13:02]
Çap et
A⁺ A^-

Xarici Ölkələrdə Yaşayan Azərbaycanlılarla İş üzrə Dövlət Komitəsindən AZƏRTAC-a bildirmişlər ki, Londonda “ARAZ Azərbaycan” qəzeti nəşrə başlamışdır.

Böyük Britaniyada yaşayan və təhsil alan bir qrup azərbaycanlı gəncin səyi və ilk universal musiqi məktəbi “All Talents Music School”un rektoru Hicran Seyidovanın himayəsi sayəsində işıq üzü görən qəzet təkcə bu ölkədə deyil, bütün Avropada yayılacaqdır.

“Londonda Azərbaycan Gəncləri Klubu”nun rəhbəri Vüsal Həmzəyev bildirmişdir ki, qəzetin nömrələrində mütəmadi olaraq Avropadakı diasporamızın fəaliyyətinə dair, eləcə də Azərbaycan haqqında xəbərlər, Ermənistanın Azərbaycana hərbi təcavüzü barədə məlumatlar əksini tapacaqdır.

24 səhifədən ibarət qəzet ilkin olaraq ayda bir dəfə, 5 min nüsxə tirajla nəşr etdiriləcəkdir.

Azərbaycan və ingilis dillərində buraxılan qəzetin yaxın vaxtlarda internet səhifəsi də (www.arazazerbaijan.com) fəaliyyətə başlayacaqdır.