Böyük və Kiçik Qafqazın əksər çaylarında suyun səviyyəsi artmışdır
Bakı, 16 iyul (AZƏRTAC). Ekologiya və Təbii Sərvətlər Nazirliyinin Milli Hidrometeorologiya Departamenti tərəfindən çayların mövcud vəziyyəti ilə bağlı araşdırma aparılmışdır.
Nazirliyin mətbuat xidmətindən AZƏRTAC-a bildirmişlər ki, araşdırmaya görə, iyulun 15-i gün ərzində, eləcə də 15-dən 16-na keçən gecə və səhərədək ölkə ərazisində yağan leysan xarakterli yağışlar nəticəsində Böyük və Kiçik Qafqazın əksər çaylarında suyun səviyyəsi artmışdır.
Böyük Qafqazın ərazisindəki Qusarçayda suyun səviyyəsi 19, Qudyalçayda 4, Vəlvələçayda 29 santimetr artmış, Kişçaydan və Kürmükçaydan qısamüddətli daşqın keçmişdir. Kiçik Qafqaz ərazisindən axan Gəncəçayda suyun səviyyəsi 11, Gorançayda 120 santimetr artmış və qısamüddətli daşqın baş vermişdir. Qarasuçayın Zərdab məntəqəsində isə suyun səviyyəsi 69 santimetr qalxmışdır.
Hazırda Böyük Qafqazın Quba-Xaçmaz bölgəsi çaylarında sululuq ongünlük normanın 100-180, Kiçik Qafqazın çaylarında 90-140, Lənkəran-Astara bölgəsi çaylarında 120-260, Naxçıvan MR çaylarında isə 150 faizini təşkil edir.
İyulun 13-dən başlayaraq Kür çayının Qıraqkəsəmən məntəqəsində suyun səviyyəsində 18 santimetr artım müşahidə edilmişdir. Çayın aşağı axınındakı Surra məntəqəsində suyun səviyyəsində 43, Şirvanda 42, Salyanda 30, Bankədə 7, Araz çayının Novruzlu məntəqəsində isə 35 santimetr azalma qeydə alınmışdır.
Bölmənin digər xəbərləri
