Buxarestdə Xocalı soyqırımına həsr olunmuş konfrans keçirilmişdir
Buxarest, 24 fevral (AZƏRTAC). Buxarest Yazıçılar Birliyi, Azərbaycanın Rumıniyadakı səfirliyinin təşəbbüsü və təşkilatçılığı, Heydər Əliyev Fondunun Rumıniyadakı nümayəndəliyinin dəstəyi ilə Buxarestdə “İnsanların sülh şəraitində birgə yaşamasının təşviqində konstruktiv dialoqun rolu: Azərbaycan diqqət mərkəzində” mövzusunda konfrans keçirilmişdir. Konfransa Türkiyənin Beynəlxalq Strateji Araşdırmalar Mərkəzinin direktor müavini Kamer Kasım məruzəçi qismində dəvət edilmişdir.
Tədbirdə Rumıniyanın ictimai təşkilat və fondlarının üzvləri, tanınmış din, ədəbiyyat, tarix və incəsənət xadimləri, KİV nümayəndələri, Rumıniyada xarici ölkələrin akkreditə olunmuş diplomatları, ölkədəki türk və tatar toplumunun təmsilçiləri, Rumıniya-Azərbaycan Dostluq Cəmiyyəti, Rumıniya-Azərbaycan Ticarət palatası, Heydər Əliyev Fondu və ARDNŞ-in Rumıniyadakı nümayəndəliyinin əməkdaşları, azərbaycanlı tələbələr iştirak etmişlər.
Tədbiri giriş sözü ilə açan səfirlik nümayəndəsi dünyada, xüsusən Cənubi Qafqazda mövcud münaqişələrin həllində konstruktiv dialoqun müstəsna rolunu qeyd etmiş, Ermənistan-Azərbaycan, Dağlıq Qarabağ münaqişəsinin sülh yolu ilə həlli istiqamətində təcavüzkar ölkənin dağıdıcı mövqeyindən bəhs etmişdir.
Buxarest Yazıçılar Assosiasiyasının Sədri və Rumıniya Yazıçılar İttifaqının Direktorlar Komitəsinin üzvü yazıçı, dramaturq Horia Qırbya Azərbaycanla bağlı təəssüratlarından danışmış, Qubadakı kütləvi məzarlıqda ermənilərin günahsız Azərbaycan xalqına qarşı törətdiyi soyqırımın dəlilləri ilə yerindəcə tanış olduğunu, Xocalı faciəsinin günümüzdə insanlıq əleyhinə ən böyük cinayət kimi qiymətləndirilməsinin vacibliyini dilə gətirmişdir. O bütün bunlara rəğmən Azərbaycan xalqının sülhsevər xalq olduğunu bildirmişdir.
Rumıniyanın və bütövlükdə regionun aparıcı nüfuzlu nəşrlərindən olan “Geopolitika” dərgisinin direktoru Vasile Simileanu ermənilərin bu qəddar əməlləri nəticəsində çoxlu sayda itkilərin olduğunu, rumın xalqının Azərbaycanın kədərini bölüşdüyünü bildirmişdir.
Kamer Kasım Ermənistan-Azərbaycan münaqişəsinin tarixi barədə iştirakçılara geniş məlumat vermişdir. O, Xocalı faciəsinin Ermənistan tərəfindən törədildiyini, kütləvi qırğınlarla nəticələndiyini və bu əməlin bəşəriyyət əleyhinə yönəlmiş cinayət olduğunu qeyd etmişdir. K.Kasım ermənilərin uydurduğu qondarma “erməni soyqırımı” və Ermənistanın Azərbaycana təcavüzünə görə Türkiyənin Ermənistanla sərhədlərini bağladığını, münaqişə həll olunmayana qədər ölkəsinin Ermənistanla sərhədlərini açmayacağını vurğulamışdır. O, Türkiyənin Ermənistanla münasibətlərində hər zaman Azərbaycanın mövqeyini nəzərə aldığını və dəstəyinin daimi olacağını qeyd etmişdir. Cənubi Qafqazda gedən proseslərin digər ölkələr tərəfindən izlənildiyini, münaqişələrin həllinin Rusiyanın təsirindən asılılığını, ATƏT-in Minsk qrupunun hazırda münaqişənin həllindəki səylərinin səmərəli olmadığını və Fransada ermənipərəst siyasi qərarların geniş vüsət aldığını nəzərə alaraq Minsk Qrupunda Fransanın öz neytrallığını itirdiyini diqqətə çatdırmış, onun tərkibinin dəyişdirilməsi və həmsədrliyə başqa Avropa ölkəsinin cəlb olunmasının vacibliyini vurğulamışdır.
Daha sonra K.Kamer Ermənistan hərbi qüvvələrinin işğal olunmuş ərazilərimizdən qeyd-şərtsiz çıxarılması barədə BMT Təhlükəsizlik Şurasının qəbul etdiyi qətnamələrinin hələ də icra edilmədiyini və bunun məsələyə ədalətsiz yanaşma olduğunu bildirmişdir.
Rumıniya-Azərbaycan Dostluq Cəmiyyətinin sədri professor Dumitru Balan, Rumıniyanın hakim Demokrat Liberal Partiyasının (PDL) Gənclər təşkilatının sədri Andrada Dinu da çıxış edərək Azərbaycan xalqının tarix boyu erməni millətçilərinin davamlı olaraq etnik təmizləmə, soyqırımı siyasətinə məruz qalmasından, öz tarixi torpaqlarından qovulmasından, qaçqın və məcburi köçkünə çevrilməsindən və bütün bunların kütləvi qırğınlarla müşayiət olunmasından danışmışlar. Onlar Azərbaycanın beynəlxalq hüquqa söykənən ədalətli haqlı mövqeyinin bərpa edilməsinə qarşı erməni lobbisinin məkrli və pozucu fəaliyyət göstərdiyini, Ermənistan dövlətinin Azərbaycan və Türkiyəyə qarşı müxtəlif iddialarını əsaslandırmaq üçün saxta dəlil və yalanlara əl atdığını vurğulamışlar.
Tədbir iştirakçıları Dialoq və Əməkdaşlıq naminə İslam Əməkdaşlığı Təşkilatı Gənclər Forumunun “Xocalıya ədalət” kampaniyasında fəal iştiraka dəvət edilmişlər.
Sonda konfrans iştirakçılarına insan hüquqları üzrə beynəlxalq təşkilatların, xarici mətbuatın və şahidlərin Xocalı dəhşətlərini əks etdirən və qətliamı təsdiqləyən kadrlar nümayiş etdirilmişdir.
Mərasim ölkənin kütləvi informasiya vasitələri tərəfindən işıqlandırılmışdır.
Bölmənin digər xəbərləri
