CAR-ın nüfuzlu mətbu orqanında Azərbaycanın mina probleminə dair məqalə dərc olunub
Bakı, 25 aprel, AZƏRTAC
Aprelin 25-də Cənubi Afrika Respublikasının (CAR) nüfuzlu və böyük oxucu auditoriyasına malik mətbu orqanı olan “Mail and Guardians” qəzetinin səhifələrində CAR-da tanınmış jurnalist, sözügedən qəzetin təsisçisi və direktoru, “Africa Asia Dialogues” (Afrasid) beyin mərkəzinin rəhbəri Tembisa Fakudenin “Minalar şəraitində ümidin bərpası” adlı, “Azərbaycan Respublikasının Minatəmizləmə Agentliyi Qarabağ bölgəsinin iki müharibə zamanı yerləşdirilən sursatlardan təmizlənməsi istiqamətində fəaliyyət göstərir” altyazı olmaqla məqaləsi dərc edilib.
Bu barədə AZƏRTAC-a Azərbaycanın CAR-dakı səfirliyindən bildirilib.
Məqalədə xüsusilə deyilir ki, minalar, xüsusən də Azərbaycanın Qarabağ bölgəsində insanların imkanlarının və potensialının tam realizə olunmasına mane olmaqda davam edir. Qarabağ minalar və partlamamış hərbi sursatlarla çox çirklənib. İkinci Qarabağ müharibəsindən indiyədək minaların partlaması nəticəsində 340-dan çox Azərbaycan vətəndaşı həlak olub və ya müxtəlif dərəcəli xəsarətlər alıb. Qarabağ İqtisadi Rayonunda 11667 kvadrat kilometr ərazinin minalarla və müharibənin digər partlayıcı qalıqları ilə örtüldüyü təxmin edilir. Mütəxəssislərin hesablamalarına görə, bölgəni minalardan və partlamamış hərbi sursatlardan təmizləmək üçün onilliklər lazım olacaq.
Məqalədə vurğulanır ki, 2021-ci ilin iyununda Ermənistan Azərbaycan hökumətinə 2020-ci ildə qısamüddətli müharibəyə son qoymaq üçün sövdələşmənin bir hissəsi kimi etnik erməni qüvvələrinin tərk etdiyi Ağdam rayonunda minalar yerləşdiyi ərazinin xəritəsini təqdim edib, lakin Azərbaycan tərəfi bu xəritələri qeyri-dəqiq və yarasız hesab edib. 2024-cü ildə Ermənistan Qarabağda minalanmış sahələrə dair əlavə səkkiz xəritə təqdim edib, lakin “Azərbaycan Respublikasının Minatəmizləmə Agentliyi”nin (ANAMA) məlumatına görə, həmin xəritələrdəki məlumatlar “qeyri-dəqiq, etibarsız və natamam” olub.
“Ermənistanın minalanmış sahələrin dəqiq və dolğun xəritələrini təqdim etməsi ilə bağlı dəfələrlə etdiyi bəyanatlara baxmayaraq, ANAMA minaların törətdiyi ciddi təhdidlərin davam etdiyini bildirib. Ermənistan “Piyadalar Əleyhinə Minaların istifadəsi, ehtiyatının toplanması, istehsalı və ötürülməsinin qadağan edilməsi və onların məhv olunması” haqqında Konvensiyanı imzalamayıb. Sözügedən Konvensiya piyada əleyhinə minaların ləğvinə yönəlib və məhz bu səbəbdən Ermənistanın mülki ərazilərdə etinasızlıq və laqeydlik hallarına yol verərək mina yerləşdirdiyinə, o cümlədən Qarabağda dəqiq mina xəritələrin aparılmamasına görə məsuliyyətə cəlb olunması bir qədər çətin görünür. Lakin beynəlxalq humanitar hüquqa əsasən, Ermənistan minalardan istifadə zamanı ayrı-seçkilik etmədən silahlara dair qadağalarla bağlıdır. Bundan irəli gələrək, minaların nizamsız, qarma-qarışıq və qaydasız yerləşdirilməsi və onların dəqiq yerləşməsinə dair xəritələrin saxtalaşdırılması beynəlxalq humanitar hüquqa ziddir. Buna baxmayaraq, Qarabağda yenidənqurma prosesində sürətli irəliləyiş müşahidə olunur, o cümlədən işğaldan azad edilmiş ərazilərdə reallaşdırılan genişmiqyaslı bərpa-quruculuq işlərinin aparılması, habelə müasir sosial-mədəni infrastrukturun qurulması, eləcə də kommunikasiya və nəqliyyat xətlərinin bərpası, xüsusilə də əhalinin həyat keyfiyyətinin yaxşılaşdırılması və iqtisadi fəaliyyətin təşviqi istiqamətində lazımi səylər göstərilir”,-deyə məqalədə bildirilir.
Bölmənin digər xəbərləri
