Çaylarda aparılmış araşdırmanın nəticələri açıqlanmışdır
Bakı, 20 iyul (AZƏRTAC). Ekologiya və Təbii Sərvətlər Nazirliyinin Milli Hidrometeorologiya Departamenti tərəfindən iyulun 20-də çaylarda suyun səviyyəsi ilə bağlı araşdırma aparılmışdır.
Nazirliyin mətbuat xidmətindən AZƏRTAC-a bildirmişlər ki, araşdırmaya görə, iyulun 19-u gün ərzində və 19-dan 20-nə keçən gecə yağan leysan xarakterli yağışlar nəticəsində Şamaxı rayonu ərazisindən axan Pirsaatçayda suyun səviyyəsi kəskin artmışdır. Naxçıvançayda suyun səviyyəsində 5, Lənkərançayda 11, Viləşçayda isə 25 santimetr artım qeydə alınmışdır.
Eyni zamanda, Kür çayının Qıraqkəsəmən məntəqəsində suyun səviyyəsində 30, Qanıx çayının Əyriçay məntəqəsində isə 48 santimetr artım müşahidə olunmuşdur.
Kür çayının aşağı axınındakı məntəqələrdə isə suyun səviyyəsində azalma qeydə alınmışdır.
Hazırda Kürün Surra məntəqəsində suyun səviyyəsi 399, Şirvanda 284, Salyanda 238, Bankədə 247, Araz çayının Novruzlu məntəqəsində isə 120 santimetrdir.
Bölmənin digər xəbərləri
