ÇİN 2008-Cİ İLDƏ KEÇİRİLƏCƏK OLİMPİADAYA 16 MİLYARD DOLLARDAN ARTIQ VƏSAİT AYIRACAQ

05.04.2004 [17:36]
Çap et
A⁺ A^-

AZƏRTAC-ın İTAR-TASS agentliyindən aldığı xəbərə görə, 2008-ci ildə Pekində keçiriləcək Olimpiya oyunları ilə əlaqədar aparılacaq tikinti işləri Çinə 136 milyard yuana (16,39 milyard dollar) başa gələcəkdir. Bu, Çində ayrıca götürülmüş bir tədbirə çəkilən xərc baxımdan rekord göstəricidir. Beş il bundan əvvəl Pekində CXR-in 50 illiyinin qeyd edilməsinə 13 milyard dollar xərclənmişdi.

Çin paytaxtında oyunlara hazırlıq prosesində 376 obyekt, o cümlədən böyük stadionlar, örtülü manejlər və idman, təhsil, mədəniyyət, ətraf mühitin qorunması sahəsinə aid digər qurğular yeniləşdirilməli, yaxud tikilməlidir. Şəhər bələdiyyəsinin planlaşdırma və islahatlar komitəsinin başçısı Din Sinyan bildirmişdir ki, 55 milyard yuan (6,63 milyard dollar) dəyərində olan 22 əsas layihə artıq hazırdır. Metronun 3 yeni xəttinin açılması da onların arasındadır.

Şəhərdə Olimpiadaya hazırlıq çərçivəsində 855 milyon yuan (təxminən 100 milyon dollar) dəyərində 500 çarpayılıq hospital da tikiləcəkdir.