Tufan Erhürman: Kipr probleminin həlli üçün “nəticəyə yönəlmiş danışıqlara” hazırıq
Bakı, 28 sentyabr, AZƏRTAC
Şimali Kipr Türk Cümhuriyyəti (ŞKTC) Prezidenti Tufan Erhürman Kipr probleminin həlli ilə bağlı bütün tərəflərlə “nəticəyə yönəlmiş danışıqlar” aparmağa hər zaman hazır olduqlarını bildirib.
AZƏRTAC xəbər verir ki, Kipr Türk Xəbər Agentliyinin (TAK) məlumatına görə, Erhürman Nyu-Yorkdakı görüşlərini qiymətləndirmək üçün Prezident sarayında mətbuat konfransı keçirib.
ŞKTC lideri Kipr probleminin həlli ilə bağlı bütün tərəflərlə səmərəli müzakirələr aparmağa həmişə hazır olduqlarını bildirərək deyib: “Biz təkcə görüş keçirmək və ya şəkil çəkmək üçün deyil, bizi həll yoluna aparacaq və uğurlu nəticələr verəcək “3+1” və ya “5+1” formatlarında görüş istəyirik”.
Erhürman həll yolu üçün vicdanla bütün səylərini göstərməyə davam edəcəklərini vurğulayıb və Nyu-Yorkdakı üçtərəfli görüşü rədd etmədiyini xatırladıb. O deyib: “Məqsədim irəliləyiş əldə etməkdir. Həll yolu, yoxsa danışıqlar istəyirik? İrəliləyiş üçün 7 məqam olduğu halda 19 yeni məqam gətirmək bişmiş yeməyə su əlavə etmək kimidir”.
Şimali Kipr Prezidenti görüşlərin Lefkoşada və ya Nikosiyada keçirilə biləcəyini, lakin onların məhsuldar olmalı olduğunu bildirərək qeyd edib: “Biz sadəcə görüşlər keçirmək xətrinə danışıqlar aparmayacağıq. Gəlin Lefkoşada marafon görüşləri keçirək və nəticə əldə edək. Bu səyləri qətiyyətlə davam etdirəcəyik, hər şeyi bütün tərəflərə izah edəcəyik və gündəmdə saxlayacağıq”.
O əlavə edib ki, BMT-nin Baş katibi Kiprə səfərinin sonunda “5+1” formatında görüş keçirmək istəyib və 7 bənd sadalayıb. Bu bəndlərə keçid məntəqələri, minatəmizləmə, adadakı fəlakətlərə birgə cavab, qeyri-qanuni miqrasiya, vətəndaş cəmiyyəti, idman və qarışıq nikahlardan doğulan uşaqlar daxildir.
Erhürman vurğulayıb ki, yunan Kiprinin liderinin son görüşdə 19 bəndlik yeni təklif təqdim etməsi “bişmiş yeməyə su qatmaq idi”.
Görüləsi çox iş olduğunu deyən və prosesi irəli aparmaqda qərarlılıq ifadə edən Şimali Kipr lideri uğurlu nəticə üçün şərait yaradıldıqda görüşlərə hazır olduqlarını bildirib.
Bölmənin digər xəbərləri
