Çingiz Məmmədov: İsrailin müdafiə nazirinə sui-qəsd cəhdində erməni izinin olması istisna deyil
Bakı, 19 fevral, AZƏRTAC
İsrailin müdafiə naziri Aviqdor Libermana sui-qəsd cəhdində erməni izinin olması istisna deyil.
AZƏRTAC xəbər verir ki, bunu müdafiə nazirinin sabiq müavini, istefada olan general-leytenant Çingiz Məmmədov Aviqdor Libermana sui-qəsdə cəhd barədə yayılan məlumatları şərh edərkən bildirib.
Çingiz Məmmədov deyib ki, İsrail-Azərbaycan münasibətlərinin, xüsusilə də hərbi sahədə ikitərəfli əməkdaşlığın inkişafı erməni tərəfinin daim ciddi narahatlığı ilə qarşılanıb. Elə bu yaxınlarda Ermənistan parlamentinin nümayəndə heyətinin İsrailə səfəri zamanı məhz A.Libermanın Azərbaycanı açıq-aydın dəstəkləməsi barədə verdiyi bəyanatlar da erməni deputatları son dərəcə məyus edib. Onu da xüsusi qeyd etmək lazımdır ki, erməni nümayəndə heyətinin İsrailə nəticəsiz, iflasa uğramış səfərindən dərhal sonra sui-qəsdin baş verməsi onun hələ səfər öncəsi planlaşdırıldığını ehtimal etməyə əsas verir.
Ermənistanın kriminal rejimi beynəlxalq terror təşkilatları, o cümlədən anti-İsrail qüvvələri ilə sıx və qarşılıqlı əlaqədə sui-qəsdlər və terror aktlarından məqsədlərinə nail olmaq üçün daim istifadə edirlər. Bildiyimiz kimi, bu üsuldan istifadə hətta bir çox erməni təşkilatlarının nizamnamələrində də öz əksini tapıb.
Dünyanın müxtəlif ölkələrində, məsələn Fransada, Rusiyada, Türkiyədə və bir çox digər yerlərdə törədilən terror aktlarında və sui-qəsdlərdə ermənilərin birbaşa iştirakı öz təsdiqini tapıb. Heç şübhəsiz ki, bu terror aktında da ermənilərin bilavasitə əli olması istisna deyil. Bu fikri təsdiq edən faktlardan biri də Ermənistanın israrlı cəhdlərinə baxmayaraq, İsrail parlamentinin qondarma “erməni soyqırımını” qəbul etməməsidir.
Bölmənin digər xəbərləri
