Çinin qanunverici orqanı Honkonqun seçki sisteminin təkmilləşdirilməsinə dair qərar qəbul edib
Pekin, 11 mart, AZƏRTAC
Çinin ali qanunverici orqanı olan Xalq Nümayəndələri Yığıncağının illik sessiyasının martın 11-dəki son iclasında Honkonq xüsusi inzibati ərazisində seçki sisteminin təkmilləşdirilməsinə dair qərar səs çoxluğu ilə qəbul olunub.
AZƏRTAC xəbər verir ki, Çin rəsmi KİV-ləri bu addımın ötən il milli təhlükəsizliyin qorunması haqqında Qanundan sonra Honkonqun hüquqi və siyasi sisteminin təkmilləşidirilməsi istiqamətində atılmış növbəti addım kimi təqdim edirlər. Doqquz maddəlik sənədin qəbulu zamanı çıxış edən qanunvericilər Honkonqun baş icraçısının seçimini və Qanunverici Şuranın formalaşmasını əhatə edən seçki sisteminin xüsusi inzibati ərazinin siyasi strukturunun vacib hissəsi olduğunu, bu sistemin "Bir ölkə, iki sistem" prinsipi və Honkonqdakı reallıq ilə uyğunlaşmalı olduğunu, Çini və Honkonqu sevənlərin xüsusi inzibati ərazini idarə etməli olduqlarını bildiriblər. Bundan başqa, Honkonqun seçki sisteminin Çinin milli suverenliyini və təhlükəsizliyini, Honkonqun uzunmüddətli tərəqqisini və sabitliyini təmin etməli, xüsusi inzibati ərazinin inkişaf maraqlarına xidmət etməli olduğu vurğulanıb.
Qərara əsasən, Honkonqda xüsusi inzibati ərazinin reallıqlarını və cəmiyyətin bütün təbəqələrini təmsil edən seçki komitəsi yaradılacaq. Ərazinin baş icraçısının, Qanunverici Şuranın bəzi üzvlərinin seçiminə cavabdeh olan komitə müxtəlif sahələri təmsil edən 1500 nəfərdən ibarət olacaq. Komitə ərazinin baş icraçısını seçdikdən sonra Çin mərkəzi hökuməti onun təyinatına qərar verəcək. Qanunverici Şuranın 90 nəfərlik tərkibi seçki komitəsinin müəyyən etdiyi şəxslərdən, habelə funksional və ərazi seçki dairələrindən seçilənlərdən ibarət olacaq.
Qeyd edək ki, bəzi xarici siyasətçilər seçki islahatının Honkonqun muxtariyyətinə birbaşa hücum olması ilə bağlı iddialar səsləndiriblər. Çinin Xarici İşlər Nazirliyi bu cür iddialara cavab olaraq bəyan edib ki, Honkonq xüsusi inzibati ərazisinin seçki sisteminin təkmilləşdirilməsi planı ölkə konstitusiyasına uyğundur və Çinin daxili işidir, heç bir ölkə buna müdaxilə etməməlidir. Rəsmi Pekin seçki sisteminin təkmilləşdirilməsinin məqsədinin xüsusi inzibati ərazidəki mövcud seçki sisteminin çatışmazlıqlarının aradan qaldırılması olduğunu bəyan edib. Çin tərəfi hesab edir ki, bu addım Honkonq xalqı üçün demokratiya və azadlığı daha yaxşı təmin edəcək.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
