SİYASƏT
Danimarkadakı azərbaycanlılar “Metro Xpress” qəzetinə etiraz məktubu ünvanlamışlar
Bakı, 11 aprel (AZƏRTAC). Danimarkada fəaliyyət göstərən “Vətən” Cəmiyyəti ölkədə böyük tirajla nəşr olunan “Metro Xpress” qəzetində Dağlıq Qarabağa turist səfərlərinin təşkili və bunun təbliği barədə məqaləyə etiraz olaraq mətbu orqanın rəhbərliyinə məktub ünvanlamışdır.
Diasporla İş üzrə Dövlət Komitəsindən AZƏRTAC-a bildirmişlər ki, Danimarka və ingilis dillərində göndərilmiş etiraz məktubunda Dağlıq Qarabağın əzəli Azərbaycan torpağı olduğu, onun ermənilər tərəfindən işğal edildiyi vurğulanmışdır. Məktubda BMT Təhlükəsizlik Şurası tərəfindən Ermənistandan Azərbaycan torpaqlarının qeyd-şərtsiz azad edilməsini tələb edən dörd qətnamənin qəbul olunduğu da bildirilmişdir. Bundan əlavə, etiraz məktubunda Azərbaycanın Dağlıq Qarabağ bölgəsinə turist səfərləri təşkil edən ermənilərin bu hərəkətlərinin qanunsuz və bunun beynəlxalq hüququn normalarına zidd olduğu vurğulanmışdır.
“Vətən” Cəmiyyətinin Danimarkada yaşayan azərbaycanlıların adından göndərdiyi etiraz məktubunda “Metro Xpress” qəzetinin gələcəkdə bu cür səhvlərə yol verməyəcəyinə ümid ifadə olunmuşdur.