Dekorativ tətbiqi sənət ustası: Tahir Salahov məni tanımasa da, müəllimim olub
Gəncə, 30 iyun, Elcan Məmmədov, AZƏRTAC
Dekorativ tətbiqi sənət dedikdə ağlımıza ilk gələn xalçaçılıq, toxuculuq, bədii tikmə, oyma və digər sənət növləridir. Bunlardan tamamilə fərqli, son illər meydana çıxan və sürətlə populyarlaşan sənət növlərindən biri də string-art yəni taxta üzərində mismar və sapla rəsm çəkmək sənətidir. Bölgələrdə də bu sənət növü ilə məşğul olan tətbiqi sənət ustalarının artması taxta üzərində sapla çəkilən rəsmə marağın olduğunu sübut edir.
AZƏRTAC-ın bölgə müxbiri Gəncədə fəaliyyət göstərən və müxtəlif tətbiqi sənət növləri ilə məşğul olan dekorativ tətbiqi sənət ustası Xanım Əhmədovanın emalatxanasına baş çəkib, onun əl işləri ilə yaxından tanış olub.
Xanım Cabir qızı Əhmədova 1993-cü il yanvarın 24-də Gəncə şəhərində anadan olub. İlk yaradıcılıq təhsilini 2001-ci ildən 2005-ci ilə qədər Gəncə Uşaq Rəssamlıq məktəbində alıb. 2008-ci ildə Gəncə Humanitar Kollecinin Təsviri incəsənət fakültəsinə qəbul olan Xanım müəllimə 2012-ci ildə buranı müvəffəqiyyətlə bitirib. 2012-ci ildən əmək fəaliyyətinə xalça sexində toxucu vəzifəsində başlayıb. Sonradan sərbəst dekorativ tətbiqi sənət ustası kimi fəaliyyət göstərir.
O, aldığı təhsillə yanaşı, fərdi formada öz üzərində işləməsi sayəsində bir çox fərqli sənət növlərinə yiyələndiyini də deyib: “On beş yaşımda rəssamlıq təhsilimi başa vurduqdan sonra digər sənət növləri ilə maraqlanmağa başladım. Portret, yağlı boya ilə rəsm işləmə, dekorativ tətbiqi sənət növlərindən string-artı, heykəltəraşlığı öyrəndim. Həmçinin art-terapiya ilə də məşğul oldum. Bir müddət psixoloji mərkəzdə art-terapist işlədim. Gənclərin işlədikləri rəsmlər, tablolar üzərində onların psixologiyasını öyrəndim”.
Art-terapiya musiqi, rəsm, ədəbiyyat kimi sənət növləri ilə həyata keçirilən terapiya növüdür. Burada əsas məqsəd fərdin özünü rahat şəkildə ifadə etməsini, yaradıcılığını artırıb, estetik yönlərinin ortaya çıxarmasını təmin etməkdir. Art-terapiyada istifadə olunan vasitələr müxtəlifdir. Qələmlər, rəngli karandaşlar, boyalar, tabaşir, barmaq-əl boyaları, divar boyası, hətta kompüterdəki bəzi yaradıcı proqramlar da aid edilə bilər.
“Hər dəfə tələbələrimə deyirəm ki, yenidən dünyaya gəlsəm, yenə də rəssam olmağı seçərdim. Çünki bu sənəti sevirəm. İnternetdə Tahir Salahovun əl işlərinə rast gəldim. Bu əsərlərə o qədər heyran qaldım ki, tez-tez onun tablolarını rəsmlərini götürüb işləyirdim, sanki o mənim müəllimim idi. Mənə sual veriləndə ki, müəllimin kim olub, deyirəm ki, o məni tanımasa da mənim müəllimim Tahir Salahov olub”,- deyə rəssam bildirib.
On ildən çoxdur ki, yaradıcılıqla məşğul olan Xanım Əhmədova deyir ki, məşğul olduğu maraqlı sənət növlərindən biri də strin- art və ya simli sənətdir. “String-art taxta üzərində mismar və sapla rəsm çəkmək sənətidir. Bu sənət növü yeni olsa da onunla maraqlananlar çoxdur. Simli sənəti digər sənət növlərindən fərqləndirən cəhət odur ki, burada qabiliyyət çox tələb olunmur”, - deyə dekorativ tətbiqi sənət ustası bildirib.
Bu gün müxtəlif tətbiqi sənət növləri üzrə 50-dən çox şagirdə dərs keçən rəssam gənclərin yaradıcılığa marağının artdığını bildirir. Bu onlar üçün həm şəxsi inkişaf baxımından, həm də gəlir mənbəyi olması baxımından faydalıdır. Amma dekorativ tətbiqi sənətlə məşğul olmaq istəyənlər bir müddət bu sahəyə gəlir mənbəyi kimi baxmamalıdır. İlk illər mütləq şəkildə şəxsi inkişaf üçün çalışmaq lazımdır.
Bölmənin digər xəbərləri
