Deputat: Səhiyyə sahəsində innovasiyalarla keyfiyyətli tibbi xidmət davamlı inkişafa töhfə verəcək
Bakı, 18 dekabr, AZƏRTAC
Prezident İlham Əliyevin rəhbərliyi ilə ölkədə həyata keçirilən səhiyyə islahatları tibbi xidmətlərin keyfiyyətinin artırılması və vətəndaşların sağlamlığının qorunması baxımından mühüm əhəmiyyət kəsb edir. Səhiyyə sahəsində elmi yanaşmaların tətbiqi, innovativ texnologiyaların gətirilməsi və kadr hazırlığının təkmilləşdirilməsi ümumi sistemin davamlı inkişafına töhfə verəcək.
AZƏRTAC xəbər verir ki, bu sözləri Milli Məclisin deputatı, ürək-damar cərrahı, tibb üzrə elmlər doktoru Rəşad Mahmudov jurnalistlərə açıqlamasında söyləyib.
O, səhiyyə sahəsində davamlı islahatların və qurumlararası əməkdaşlığın əhəmiyyətinə toxunub: “Ölkəmizdə səhiyyə sisteminin müasirləşdirilməsi və əhalinin tibbi xidmətlərə əlçatanlığının təmin edilməsi məqsədilə mühüm addımlar atılır. Səhiyyə xidmətlərinin daha əlçatan və effektiv olmasını təmin etmək üçün müxtəlif tibb xidməti idarələri arasında əməkdaşlıq mexanizmlərinin gücləndirilməsi vacibdir. Hər bir qurumun yalnız öz gündəlik işləri ilə məhdudlaşması kifayət etmir. Əksinə, bu qurumlar arasında əlaqələrin möhkəmləndirilməsi və resursların səmərəli istifadəsi ümumi səhiyyə sisteminin inkişafına daha böyük töhfə verə bilər. Qurumlararası əməkdaşlıq təkcə tibbi xidmətlərin operativliyini artırmır, eyni zamanda, səhiyyə sistemində davamlı inkişafı təmin edir. Bu əməkdaşlıq vasitəsilə elmi-təcrübi və tədris sahələrində təcrübə mübadiləsi, birgə layihələrin reallaşdırılması və tibb işçilərinin peşəkarlığının artırılması üçün yeni imkanlar açılır.
R.Mahmudov yeni texnologiyaların səhiyyə sisteminə tətbiqi məsələsindən də danışıb: “İnnovativ texnologiyaların ölkəyə gətirilməsi, onların təhlükəsiz və effektiv şəkildə səhiyyə xidmətinə inteqrasiyası xüsusi əhəmiyyət kəsb edir. Müasir texnologiyalar yalnız xidmətin keyfiyyətini artırmaqla kifayətlənmir, eyni zamanda, xəstələrin sağlamlığı üçün də əlavə təminatlar yaradır. Yeni texnologiyaların tətbiqi ilə səhiyyə sistemində əhəmiyyətli irəliləyişlər əldə olunacaq. Biz bunun yalnız müalicə prosesində deyil, diaqnostika və profilaktika sahələrində də faydalı nəticələr verəcəyinə inanırıq. Bununla yanaşı, tibbi işçilərin yeni texnologiyalardan istifadəsi üçün davamlı təlimlərin keçirilməsi də vacibdir.
Deputat səhiyyə islahatlarının əsas hədəfinin əhalinin tibbi xidmətlərə çıxışını asanlaşdırmaq və hər kəs üçün keyfiyyətli tibbi xidmət təmin etmək olduğunu bildirib: “Səhiyyə xidmətinin hər bir vətəndaş üçün əlçatan olması Prezident İlham Əliyevin həyata keçirdiyi sosial siyasətin əsas prioritetlərindən biridir. Bu gün dövlətimizin sosial siyasətində vətəndaş mərkəzli yanaşma əsas götürülüb. Biz səhiyyə sistemində də bu prinsipi rəhbər tuturuq. Əhalinin tibbi xidmətlərə çıxışının asanlaşdırılması üçün yeni infrastrukturun yaradılması, yeni texnologiyaların tətbiqi və xidmət səviyyəsinin artırılması əsas hədəflərimizdəndir”.
“Tibbi xidmətlər müasir texnologiyalarla daha da təkmilləşdiriləcək, vətəndaşların sağlamlıq vəziyyəti daha yüksək səviyyəyə qaldırılacaq. Tibbi xidmət sahəsində görüləcək işlər uzunmüddətli perspektivdə ölkənin səhiyyə strategiyasının əsas tərkib hissəsi olacaq. Gələcəkdə atacağımız addımlar daha böyük nailiyyətlərə səbəb olacaq. Biz elmi yanaşmanı, müasir texnologiyaların tətbiqini və beynəlxalq təcrübədən faydalanmağı prioritet hesab edirik. Bu məqsədlə tibb işçilərinin davamlı təhsilini, tibbi xidmətlərin əlçatanlığını və vətəndaşların sağlamlığının qorunmasını təmin edəcəyik. Bu islahatlar hər bir vətəndaşın sağlamlığına müsbət təsir göstərəcək”, – deyə Rəşad Mahmudov əlavə edib.
Bölmənin digər xəbərləri
