Xarici Ölkələrdə Yaşayan Azərbaycanlılarla İş üzrə Dövlət Komitəsinin mətbuat xidmətindən AZƏRTAC-a bildirmişlər ki, Azərbaycan diaspor təşkilatları 28 may - Respublika günü, Azərbaycan Demokratik Respublikasının 90 illik yubileyi ilə bağlı müxtəlif tədbirlər keçirməyə başlamışlar.

Mayın 22-də ABŞ-ın Los-Anceles şəhərində “Amerikalı Azərbaycanlıları Şurası” Azərbaycanın Los-Ancelesdəki baş konsulluğu ilə birgə Respublika günü münasibətilə böyük tədbir keçirmişlər. Parisdə fəaliyyət göstərən “Azərbaycan evi” də Azərbaycan Demokratik Respublikasının 90 illiyini mayın 22-də qeyd etmişdir. Mayın 23-də isə Fransanın Strasburq şəhərindəki “Azərbaycan evi” və Romada fəaliyyət göstərən “Nizami” Cəmiyyəti Respublika günü münasibətilə tədbirlər keçirəcəklər.

Avropanın digər ölkələrində yaşayan soydaşlarımız da Respublika günü münasibətilə bayram tədbirləri planlaşdırmışlar. Praqada Azər-Çex Cəmiyyəti ADR-in 90 illik yubileyini qeyd etmək məqsədi ilə tədbirlər planı hazırlamışdır. Buraya Çexiya parlamentinin Senatında “ADR-in yaranma tarixi və nailiyyətləri - Yeni Azərbaycanın bu günü və sabahı” adlı seminar, Mərkəzi Mədəniyyət Sarayında - Azərbaycan mədəniyyəti festivalı və Boulinq turniri daxildir. Tədbirlər mayın 28-30-da keçiriləcəkdir.

Niderlandın Amsterdam şəhərində Benilüks Azərbaycanlıları Konqresinin “Azərbaycan - Şərqin ilk demokratik dövləti: keçmişdən gələcəyə doğru 90 il” devizi altında tədbirlər keçirməsi nəzərdə tutulmuşdur. Budapeştdəki Millətlər Evində Macarıstan-Azərbaycan Dostluq Cəmiyyəti Azərbaycanın bu ölkədəki səfirliyi ilə birlikdə 28 may - Respublika gününü qeyd edəcəkdir. Moldova Azərbaycanlıları Konqresi isə Azərbaycanın Moldovadakı səfirliyi ilə birlikdə Kişineudakı Milli Azlıqlar Evində Şərqdə ilk demokratik respublikanın - ADR-in 90 illiyinə həsr olunmuş bayram şənliyi təşkil edəcəkdir.

Rumıniyada fəaliyyət göstərən Azərbaycan Gənclər və Mədəniyyət Assosiasiyası, Heydər Əliyev Fondunun Rumıniya nümayəndəliyi və Azərbaycanın Rumıniyadakı səfirliyi bu ölkədəki soydaşlarımızı və digər xalqların nümayəndələrini Buxarestdəki Diplomatik Klubda keçiriləcək bayram tədbirinə toplayacaqlar. Tallində fəaliyyət göstərən Aydan-Eston Mədəniyyət Mərkəzi Azərbaycan Demokratik Respublikasının yaradılmasının 90 illiyi münasibətilə böyük tədbir keçirəcəkdir. Tədbirdə Estoniyanın sabiq prezidenti Arnold Ruutel, Estoniya parlamentinin spikeri, vitse-spikeri, Estoniyanın münasibətlər naziri Eurve Palo, Estoniya parlamentinin üzvü, Estoniya-Azərbaycan parlamentlərarası qrupunun sədri Eldar Əfəndiyev, deputat Evelin Sepp, Tallin şəhərinin meri Edqar Savisaarın iştirakı nəzərdə tutulmuşdur. Tədbirdə “Heydər Əliyev və Azərbaycan diasporu” və “Azərbaycan Demokratik Respublikası” mövzularında sərgilər təşkil olunacaqdır. Həmin sərgilər 2 gün Estoniya Parlamentində də nümayiş etdiriləcəkdir. Tədbirdə, həmçinin “XIX və XX əsrlərdə Estoniyada azərbaycanlılar” adlı kitabın təqdimatı olacaqdır. Konfransdan sonra sənədli film nümayiş etdiriləcəkdir.

Vilnüsdəki Litva Azərbaycanlıları Cəmiyyəti Azərbaycanın Litvadakı səfirliyi ilə birlikdə Respublika günü münasibətilə konfrans, Riqa Filarmoniyasında isə “Ocaq” Cəmiyyəti Azərbaycanın Latviyadakı səfirliyi ilə birgə bayram konserti təşkil edəcəklər. Mayın 24-də İsveçrənin iki şəhərində Respublika günü qeyd olunacaqdır. Linköpinqdə “Azərbaycan Federasyonu İsveç”ə (AFİ) daxil olan Babək-Linköpinq Dərnəyi bayram konserti, Berndə isə Azərbaycanlıların İsveçrədəki Mədəniyyət Mərkəzi cümhuriyyətin 90 illiyinə dair konfrans keçirəcəkdir.

Fransanın Tuluza şəhərindəki Azərbaycanlı Tələbələr Assosiasiyası, Parisdəki “Azərbaycan-Fransız Gənclər Assosiasiyası” və “Təhsil və Tədqiqatların İnkişafı üzrə Fransa-Azərbaycan Tələbə Assosiasiyası”, Metsdəki Fransada Azərbaycanlıların Diaspor Mərkəzi, Muluzdakı Azərbaycan Fransa Mədəniyyət Assosiasiyasi (A.F.M.A.) Azərbaycan Demokratik Respublikasının 90 illik yubileyinə həsr olunmuş müxtəlif tədbirlər keçirəcəklər.

Böyük Britaniyada Caspian Xəzri, Barselonada “Dostluq” İspaniya-Azərbaycan Assosiasiyası, İtaliyanın Padova şəhərində İtaliya-Azərbaycan “Dostluq” Assosiasiyası, Berlində Azis-Almaniya Beynəlxalq Assosiasiyası, İsveçdə Xəzər-Azərbaycan Dostluq Cəmiyyəti, Kopenhagendə isə Danimarka-Azərbaycan Cəmiyyəti konfranslar və görüşlər təşkil edərək Azərbaycanın dövlətçilik tarixində ən mühüm əhəmiyyət kəsb edən günlərdən biri - 28 may Respublika günü barədə ətraflı məlumat verəcəklər.

Mayın 26-da İsraildə Azərbaycan-İsrail Beynəlxalq Assosiasiyası Knessetin Auditorium zalında Azərbaycan Demokratik Respublikasının yaradılmasının 90 illiyi, Dağ Yəhudilərinin Vətənə dönüşünün 160 illiyi münasibətilə İsrail hökuməti üzvləri, Azərbaycan və Rusiyadan dəvət olunan qonaqlar, İsraildəki diplomatik korpusun nümayəndələrinin iştirakı ilə tədbir keçirəcəkdir.

Mayın 28-də Kanadanın Toronto şəhərində fəaliyyət göstərən “Kanada-Azərbaycan Alyansı”, “Kanada-Azərbaycan Assosiasiyalar Assambleyası” Respublika günü münasibətilə tədbir, Monreal şəhərindəki Kvebek Azərbaycanlıları Assosiasiyası isə bayram konserti təşkil edəcəklər. ABŞ-dakı “Hyuston-Bakı” Qardaşlaşmış Şəhərlər Assosiasiyası da 28 May bayramını mayın 28-də qeyd edəcəkdir.

Birləşmiş Ərəb Əmirliklərinin Dubay şəhərindəki Azərbaycan Cəmiyyəti, Misirdəki Vətən Tələbə Cəmiyyəti, Avstraliyanın Sidney şəhərindəki Azərbaycanlılar Cəmiyyəti, Yeni Zelandiyanın Okland şəhərindəki “Azəri” Yeni Zelandiya-Azərbaycan Dostluq Cəmiyyəti və “Azərbaycan-Yeni Zelandiya Dostluq Cəmiyyəti” də Azərbaycan Demokratik Respublikasının yaradılmasının 90 illiyini qeyd edəcək, Azərbaycan, türk və digər xalqların diaspor təşkilatlarının təmsilçilərinə tariximizin 28 May kimi parlaq səhifəsi barədə ətraflı məlumat verəcəklər. Ankarada isə Türkiyə Azərbaycan Dərnəkləri Federasiyası Azərbaycan Demokratik Respublikasının 90 illiyi ilə bağlı “Bir dəfə yüksələn bayraq bir daha enməz” adlı elmi-praktik konfrans keçirəcəkdir.

Tbilisidə “Gürcustan Azərbaycanlıları Konqresi” Azərbaycanın Gürcüstandakı səfirliyi ilə birlikdə ADR-in yaradıcılarından Xan Xoyskinin və Həsən bəy Ağayevin Botanika bağındakı qəbirüstü abidələrinə ziyarət təşkil edəcəkdir. Daha sonra vaxtilə ADR Hökumətinin fəaliyyət göstərdiyi Tbilisi Dövlət Gənclər Sarayında Respublika günü münasibətilə toplantı keçiriləcəkdir. Marneulidə isə “Azərbaycanlıların Mədəniyyət Mərkəzi” Azərbaycanın Gürcüstandakı səfirliyi ilə birlikdə Azərbaycan Demokratik Respublikasının 90 illiyinə həsr olunmuş dəyirmi masa təşkil edəcəkdir.

Özbəkistanda fəaliyyət göstərən “Azərbaycan Mədəniyyət Mərkəzləri Assosiasiyası” Respublika gününü qeyd etməyə hazırlaşır. Azərbaycanın bu mühüm dövlət bayramı Qazaxıstanın üç şəhərində qeyd olunacaqdır. Astanada “Xəzər” İctimai Birliyi Azərbaycanın Qazaxıstandakı səfirliyi ilə birlikdə, Petropavlovksdakı “Azərbaycan Mədəniyyət Mərkəzi”, Aktauda isə “Dostluq” Azərbaycan Mədəniyyət Mərkəzi ilə “Turan” konqresi birgə konfranslar keçirəcəklər.

Azərbaycan Demokratik Respublikasının 90 illik yubileyi Rusiya Federasiyasının bütün əyalətlərində qeyd ediləcəkdir. Ümumrusiya Azərbaycan Konqresinin bütün regional təşkilatları, eləcə də Azərbaycan Milli Mədəni Muxtariyyəti Respublika günü münasibətilə tədbirlər təşkil edəcəklər. Kiyev şəhərində Ukrayna Azərbaycan Konqresi ADR-in yubileyini dəyirmi masa ilə qeyd edəcəkdir. Minskdə isə Belarus Azərbaycan İcmaları Konqresi, Azərbaycanın Belarusdakı səfirliyi və “Azərbaycan Televiziya və Radio Verilişləri” QSC birlikdə ADR-in yaradılmasının 90 illiyi münasibətilə “Belarus-Azərbaycan dostluq körpüsü” adlı tədbir və böyük konsert proqramı təşkil edəcəklər.