DNEPR SAHİLLƏRİNDƏ DÖRDULDUZLU “KASPİ” HOTELİ AÇILMIŞDIR

28.11.2005 [22:28]
Çap et
A⁺ A^-

AZƏRTAC-ın xüsusi müxbiri xəbər verir ki, noyabrın 26-da Ukraynanın Dnepropetrovsk şəhərinin mərkəzində dördulduzlu “Kaspi” hotelinin təntənəli açılışı olmuşdur. Hotelin sahibi həmvətənimiz Fəxrəddin Muxtarovdur. Qərb və Şərq memarlıq elementlərinin ahəngdar şəkildə uzlaşdığı, o cümlədən zərif şəbəkə ilə bəzədilmiş 6 mərtəbəli bina Ukraynanın bu ən iri sənaye, mədəni və elmi bölgəsi mərkəzinin əsil yaraşığına çevrilmişdir. Hoteldə 24 nömrə, o cümlədən lüks nömrələr, Azərbaycan, Ukrayna və Avropa mətbəxinin müxtəlif yeməkləri təklif edilən 3 restoranı, geniş konfrans salonu, avtomobil dayanacağı və s. var. Rahat mebel, naxışlı qapılar və original işıqlandırma cihazları sifarişlə Türkiyədə hazırlanmışdır.

Hotelin açılış mərasimində Azərbaycanın Ukraynadakı səfiri Tələt Əliyev, Dnepropetrovsk şəhər dövlət administrasiyasının başçısı İvan Kliçenko və başqaları iştirak etmişlər. Səfir bildirmişdir ki, belə əlamətdar hadisələr xalqlarımız və ölkələrimiz arasında, o cümlədən regionlararası səviyyədə münasibətləri möhkəmləndirir. Diplomat Dnepropetrovsk vilayətinin Azərbaycan üçün əhəmiyyətini vurğulayaraq xatırlatmışdır ki, burada istehsal olunan borularla verilən mavi yanacaq Naxçıvan sakinlərinin mənzillərini qızdırır.

İ.Kliçenko Dnepropetrovsk vilayətinin inkişafına səmərəli təsir göstərən, sıx birləşmiş, mütəşəkkil Azərbaycan diasporunun bölgədə iş yerlərinin yaradılmasında rolunu yüksək qiymətləndirmişdir. O bildirmişdir ki, Azərbaycan və yəhudi diasporları fəallığına görə regionda öndə gedirlər.

Mərasimdə Dnepropetrovsk Azərbaycanlıları liqasının fəxri sədri Hafiz Aslanovun və diasporumuzun digər liderlərinin ünvanına çoxlu səmimi sözlər deyilmişdir.

DNEPR SAHİLLƏRİNDƏ DÖRDULDUZLU “KASPİ” HOTELİ AÇILMIŞDIR

MÜƏLLİFLƏ ƏLAQƏ

Bölmənin digər xəbərləri