SİYASƏT
“Dostluq” cəmiyyətindən olan gənc həmvətənlərimiz Xarkov vilayətində “Barvinok” sağlamlıq düşərgəsində istirahət edirlər
Kiyev, 20 avqust (AZƏRTAC). Ukraynanın Xarkov Vilayət Dövlət Administrasiyasının Daxili siyasət və əlaqələr idarəsinin təşəbbüsü və maliyyə dəstəyi ilə dalbadal üç ildir “Milli ornamentlər” layihəsi həyata keçirilir. Müxtəlif milli-mədəni birliklərdən uşaqların cəlb olunması bu layihənin fərqləndirici xüsusiyyətidir. Bu layihə Ukraynada dövlət hakimiyyəti orqanları tərəfindən həyata keçirilən orijinal və yeganə layihədir.
Layihə uşaqları vilayətdə yaşayan müxtəlif millətlərin ayin və ənənələri ilə tanış etmək, regionda tolerant münasibətin və beynəlxalq sabitliyin yaranmasına dəstək göstərmək məqsədi daşıyır.
Bu il “Barvinok” düşərgəsində ”Dostluq” Ukrayna-Azərbaycan Cəmiyyətindən 11 uşaq dincəlir.
Cəmiyyətin rəhbərləri və uşaqların valideynləri avqustun 18-də düşərgəyə baş çəkərək, istirahət gününü uşaqlarla birlikdə maraqlı keçirmişlər. Milli-mədəni birliklərin yaradıcı kollektivləri ümumi səhnədə maraqlı konsert proqramı ilə çıxış etmişlər.
Düşərgə avqustun 22-də başa çatacaqdır.
Zeynal Ağazadə
AZƏRTAC-ın xüsusi müxbiri
Kiyev