Naxçıvan, 4 dekabr, AZƏRTAC

Daxili bazarda məhsul bolluğunun yaradılmasında, əhalinin zəruri ərzaq məhsullarına tələbatının daha dolğun şəkildə ödənilməsində baytarlıq xidmətinin mühüm rolu vardır. Ona görə də muxtar respublikada baytarlıq xidmətinin təşkili istiqamətində ardıcıl tədbirlər həyata keçirilir, Dövlət Baytarlıq Xidmətinin maddi-texniki bazası mütəmadi olaraq gücləndirilir.

Naxçıvan Muxtar Respublikası Ali Məclisinin mətbuat xidmətindən AZƏRTAC-a bildirilib ki, dekabrın 4-də Naxçıvan Muxtar Respublikası Dövlət Baytarlıq Xidmətinə yeni laboratoriya cihazları və süni mayalanma avadanlıqları təqdim olunub.

Naxçıvan Muxtar Respublikası Ali Məclisinin Sədri Vasif Talıbov tədbirdə iştirak edib.

Dövlət Baytarlıq Xidmətinin rəisi Əbil Əbilov çıxış edərək deyib ki, muxtar respublikada həyata keçirilən tədbirlər baytarlıq xidmətini də əhatə edib, maddi-texniki baza xeyli gücləndirilib. Son illər Şərur, Sədərək, Babək, Şahbuz rayon baytarlıq idarə və laboratoriyaları üçün yeni binalar tikilib, laboratoriyalar yeni avadanlıqlarla təmin olunub. Dövlət Baytarlıq Xidməti, Elmi-Tədqiqat Baytarlıq Mərkəzi, Mərkəzi Baytarlıq Laboratoriyası, Naxçıvan Şəhər Baytarlıq İdarəsi və Naxçıvan Muxtar Respublikası Zoobaytar Təchizat İdarəsi üçün binalar yenidən qurulub, dərmanların saxlanılması üçün soyuducu kameralar quraşdırılıb.

Qeyd olunub ki, Dövlət Baytarlıq Xidməti tərəfindən bu il peyvəndləmə tədbirləri görülüb, ümumilikdə, 11 min 599 obyektdə epizootiya əleyhinə dezinfeksiya işləri aparılıb. Xidmətin ekspertiza və bakterioloji laboratoriyaları tərəfindən patoloji nümunələr götürülərək infeksion xəstəliklərə görə müayinə olunub, 138 halda xəstəlik qeydə alınıb və aidiyyəti tədbirlər həyata keçirilib. 2014-cü ilin 11 ayı ərzində muxtar respublikada Dövlət Baytarlıq Xidmətinin süni mayalandırma texnikləri tərəfindən 6793 baş mal-qarada süni mayalama aparılıb, mayalanmış mal-qaradan bu günədək 6020 baş sağlam bala alınıb. Həmçinin Elmi-Tədqiqat Baytarlıq Mərkəzinin fəaliyyəti mütəmadi olaraq baytarlıq xidmətinin apardığı tədbirlərlə əlaqələndirilir. Hazırda mərkəz tərəfindən 4 elmi-tədqiqat mövzusu üzrə işlər aparılır, 3 mövzu üzrə ixtira işləri gündəlik baytarlıq fəaliyyətində tətbiq olunur.

Əbil Əbilov yaradılan şəraitə və göstərilən qayğıya görə Dövlət Baytarlıq Xidmətinin əməkdaşları adından minnətdarlıq edib.

Naxçıvan Muxtar Respublikası Ali Məclisinin Sədri Vasif Talıbov muxtar respublikada baytarlıq xidmətinin təşkili sahəsində göstərdikləri səylərə və işlərində fərqləndiklərinə görə baytarlıq xidmətinin əməkdaşlarına təşəkkür edərək deyib: Ölkəmizdə kənd təsərrüfatının inkişafına lazımi dövlət qayğısı göstərilir. Bu sahə üzrə həyata keçirilən tədbirlər, xüsusilə subsidiyaların verilməsi, maddi-texniki bazanın gücləndirilməsi, yeni texnikaların, məhsuldar toxum sortlarının və cins mal-qaranın alınıb gətirilməsi, torpaq mülkiyyətçiləri və fermerlər üçün hərtərəfli şəraitin yaradılması kənd təsərrüfatının inkişafına stimul verib.

Ali Məclisin Sədri deyib: Hər bir ölkədə ərzaq təhlükəsizliyinin təmin olunması kənd təsərrüfatının inkişafından, kənd təsərrüfatının inkişafı isə əhatə etdiyi sahələrdə fəaliyyətin düzgün təşkilindən asılıdır. Belə sahələrdən biri də baytarlıq xidmətidir. Baytarlıq xidmətini düzgün təşkil etmədən, bu sahə üzrə qarşıya qoyulan vəzifələri yerinə yetirmədən əhalinin təhlükəsiz ərzaq məhsulları ilə təminatını həyata keçirmək mümkün deyil. Çünki sağlam ərzaq məhsullarının istehsalı ərzaq təhlükəsizliyinin təmin olunmasında başlıca şərtdir. Sağlam ərzaq məhsulları ilə təminat insanların sağlamlığına, sağlam insanlar isə ölkənin inkişafına xidmət edirlər. Ona görə də əhalinin sağlamlığının qorunması baytarlıq xidmətinin inkişafını zəruri edir.

Ali Məclisin Sədri deyib: Ölkəmizdə, eləcə də muxtar respublikamızda baytarlıq xidmətinin təşkili istiqamətində ardıcıl tədbirlər həyata keçirilir. Bu gün muxtar respublikada Dövlət Baytarlıq Xidməti, Elmi-Tədqiqat Baytarlıq Mərkəzi, 170 sahə baytarlıq məntəqəsi və 9 baytar sanitar ekspertiza laboratoriyası fəaliyyət göstərir. Muxtar respublikada bir inzibati ərazi dairəsi üzrə nümayəndəlik və bir baytarlıq məntəqəsi prinsipi əsas götürülərək bütün yaşayış məntəqələri baytarlıq xidməti ilə əhatə olunub. Kənd mərkəzlərində istifadəyə verilən baytarlıq məntəqələri lazımi avadanlıqlarla təmin olunub, süni mayalandırma tədbirlərinin aparılması üçün hərtərəfli şərait yaradılıb. Həyata keçirilən bu tədbirlər muxtar respublikada mal-qara arasında xəstəliklərin qarşısının alınmasına və sağlam ərzaq məhsullarının istehsalına səbəb olub. Hazırda muxtar respublikada 110 min baş iribuynuzlu, 690 min başa yaxın xırdabuynuzlu, 68 min arı ailəsi saxlanılır. Bu da baytarlıq xidmətinin nümunəvi təşkilini zəruri edir. Dövlət Baytarlıq Xidmətinin əməkdaşları yaradılan şəraitdən düzgün istifadə etməli, bundan sonra da qarşıya qoyulan vəzifələri layiqincə yerinə yetirməlidirlər.

“Əgər səhiyyə xidməti cəmiyyətin xəstələnmiş üzvlərini əhatə edirsə, baytarlıq xidməti cəmiyyətin bütün üzvlərinin sağlamlığının qorunmasına xidmət edir. Çünki sağlam ərzaq məhsulları ilə təminat sağlam həyat tərzi deməkdir”, - deyən Ali Məclisin Sədri muxtar respublikada baytarlıq xidmətinin təşkili sahəsində qarşıya qoyulan vəzifələrə nail olunduğunu bildirib, bir daha kollektivi təbrik edib.

Sonra Ali Məclisin Sədri Dövlət Baytarlıq Xidməti üçün alınmış yeni avadanlıq və ləvazimatlara baxıb.

Məlumat verilib ki, Baytarlıq Laboratoriyasının maddi-texniki bazasının gücləndirilməsi məqsədilə 27 adda müxtəlif avadanlıq və 26 adda müxtəlif ləvazimat, süni mayalanma tədbirlərinin genişləndirilməsi üçün 15 ədəd yedəkli motosiklet, 32 ədəd süni mayalama çantası və 10 adda müxtəlif ləvazimatlar alınıb gətirilib. Yeni alınan laboratoriya cihazları, süni mayalama avadanlıqları və texnikalar heyvandarlıq sahəsinin intensiv inkişafına, müasir texnologiyalardan istifadəyə, o cümlədən baytarlıq sahəsində elmi nailiyyətlərin və qabaqcıl təcrübənin tətbiqinə imkan verəcəkdir. Bioloji mikroskoplar, sanitar ekspertiza avadanlıqları və digər ləvazimatlar heyvandarlıq məhsullarının fiziki-kimyəvi xassəsinin və bioloji strukturlarının yoxlanılmasında, baytarlıq sahəsində biotəhlükəsizlik tədbirlərinin həyata keçirilməsində mühüm əhəmiyyət daşıyır.

Ali Məclisin Sədri muxtar respublikanın rayonlarında fəaliyyət göstərən baytarlıq idarələrinə verilən süni mayalandırma avadanlıq dəstlərini texniklərə təqdim edib, Naxçıvan Muxtar Respublikası Dövlət Baytarlıq Xidmətinin işdə fərqlənən bir qrup əməkdaşına hədiyyələr verib.

Baytarlıq xidməti əməkdaşları ilə söhbət zamanı Ali Məclisin Sədri Dövlət Baytarlıq Xidmətinin laboratoriyalarında muxtar respublikanın ali və orta ixtisas məktəblərində baytarlıq ixtisası üzrə təhsil alan tələbələrin təcrübə keçməsi, yerlərdə maarifləndirmə işlərinin aparılması və süni mayalandırma tədbirlərinin genişləndirilməsi barədə müvafiq tapşırıqlar verib.