DÜNYA İNFORMASİYA AGENTLİKLƏRİ FORUMU YARADILMASI TƏKLİFİ BƏYƏNİLİR

08.06.2004 [16:51]
Çap et
A⁺ A^-

AZƏRTAC xəbər verir ki, Asiya və Sakit Okean Ölkələri İnformasiya Agentlikləri Təşkilatının (OANA) XII Baş assambleyası Dünya İnformasiya Agentlikləri Forumu yaradılması barədə İTAR-TASS-ın və bu təşkilatın bir sıra digər üzvlərinin təşəbbüsünü bəyənmişdir. Bu, iyunun 8-də Malayziyanın paytaxtı Kuala-Lampurda işini başa çatdıran Baş assambleyanın yekun sənədində açıqlanmışdır.

Sənəddə deyilir ki, Dünya Forumu “informasiya agentliklərinin fəaliyyəti üçün mühüm sahələrdə onların ümumi mənafelərini qorumalıdır”. İnformasiya agentlikləri bu birlikdə öz iştirak dərəcəsini müstəqil surətdə müəyyənləşdirəcəklər.

Nəzərdə tutulduğuna görə, Dünya Forumu İTAR-TASS agentliyinin 100 illiyi münasibətilə şənliklər çərçivəsində cari ilin sentyabrında Moskvada yaradılacaqdır. O, iki-üç ildə bir dəfə yığışacaq daimi fəaliyyət göstərən orqan olacaqdır.

Baş assambleyada İTAR-TASS agentliyi OANA-nın prezidenti səlahiyyətini növbəti üç il müddətinə Malayziyanın BERNAMA informasiya agentliyinə vermişdir.

OANA-nın növbəti Baş assambleyası 2007-ci ildə Banqkokda keçiriləcəkdir.

Xatırladaq ki, hazırda OANA-ya 31 ölkənin 37 informasiya agentliyi daxildir.