DÜNYA KUBOKUNU AZƏRBAYCAN PƏHLƏVANLARI QAZANDILAR
Yarışların birinci günü “B” qrupunda Rusiya-İran, Rusiya-Kuba görüşləri keçirilmişdir. Hər iki görüş rusiyalıların qələbəsi ilə qurtarmışdır. Həmin gün “A” qrupunda Kanada - CAR və Azərbaycan - CAR komandaları qarşılaşmışdılar. Kanadalılar 26:6 hesabı ilə qalib gəlmişlər. Azərbaycan pəhləvanları isə CAR komandasını 27:1 hesabı ilə məğlubiyyətə uğratmışlar.
Aprelin 4-də səhər xalçada əvvəlcə Azərbaycan və Kanada komandaları görüşmüşlər. Azərbaycan idmançıları daha inamla çıxış edərək, 6:1 hesabı ilə qalib gəlmiş və finala vəsiqə qazanmışlar. “B” qrupunda İran-Kuba görüşü kubalıların xeyrinə qurtarmışdır - 5:2. Rusiya ilə İran arasında görüşün nəticəsi finalı çıxmaq baxımından həlledici əhəmiyyətə malik idi. Xalların cəminə görə finala rusiyalılar çıxdılar.
Üçüncü yer uğrunda görüşdə Kuba və Kanada komandaları qarşılaşdılar. Görüş kubalıların aşkar üstünlüyü şəraitində keçdi və onlar üçüncü yeri tutdular.
Sonra Azərbaycan və Rusiya güləşçiləri arasında final görüşləri keçirildi. 55 kiloqram çəkidə olimpiya çempionu Namiq Abdullayev Jarjal Dondukovu 4:2 hesabı ilə məğlubiyyətə uğratdı. 60 kiloqram çəkidə Adil İbrahimov Ramil İslamova 2:4 hesabı ilə uduzdu. 66 kiloqram çəkidə Elman Əsgərov Dimitri Kirillova 4:2 hesabı ilə qalib gəldi. 74 kiloqram çəkidə Elşad Allahverdiyev Sergey Vitkovskiyə 2:5 hesabı ilə uduzdu. 84 kiloqram çəkidə Vüqar Qurbanov Teymuraz Koçiyevi (4:3), 96 kiloqram çəkidə Rüstəm Ağayev Aleksey Şemarovu (3:2) məğlubiyyətə uğratdılar. 120 kiloqram çəkidə Nikolay Telegin David Musulbekə uduzdu - 3:4. Beləliklə, Azərbaycan yığma komandası 4:3 hesabı ilə qələbə qazanaraq, MDB məkanında ilk dəfə, sərbəst güləş üzrə Dünya kubokuna layiq görüldü.
Sonra mükafatların təqdim edilməsi mərasimi keçirildi. Qalib komandaya kubok və medalları Beynəlxalq Güləş Federasiyasının prezidenti Rafael Martinetti, Azərbaycan Güləş Federasiyasının prezidenti Abbas Abbasov, gənclər, idman və turizm naziri Əbülfəz Qarayev təqdim etdilər. Namiq Abdullayev yarışların ən yaxşı güləşçisi elan olundu. Ona 5 min İsveçrə markası məbləğində mükafat təqdim edildi.
Dünya kubokunun mükafat fondu 120 min dollar idi. Onun 50 min dollarını Azərbaycan, 40 minini Rusiya, 30 minini Kuba komandaları alacaqlar.
Yarışların qalibi olan Azərbaycan yığma komandasının şərəfinə ölkəmizin himni səsləndi.
Bölmənin digər xəbərləri
