Ekologiya və Təbii Sərvətlər Nazirliyinin işçiləri peşə bayramlarını qeyd etmişlər
Bakı, 23 may (AZƏRTAC). Mayın 23-ü Ekologiya və Təbii Sərvətlər Nazirliyi (ETSN) işçilərinin peşə bayramıdır. Azərbaycan müstəqilliyini bərpa etdikdən sonra ümummilli lider Heydər Əliyevin 23 may 2001-ci il tarixli Fərmanı ilə Ekologiya və Təbii Sərvətlər Nazirliyi yaradılmışdır. 23 may - Ekologiya və Təbii Sərvətlər Nazirliyi işçilərinin peşə bayramı isə Prezident İlham Əliyevin 16 may 2007-ci il tarixli Sərəncamı ilə təsis olunmuşdur.
AZƏRTAC xəbər verir ki, bu münasibətlə nazirliyin əməkdaşları mayın 23-də Fəxri xiyabana gələrək xalqımızın ümummilli lideri, müasir müstəqil Azərbaycan dövlətinin memarı və qurucusu Heydər Əliyevin xatirəsini ehtiramla yad etmiş, məzarı önünə əklil qoymuş və güllər düzmüşlər.
Ekoloqlar görkəmli oftalmoloq alim, akademik Zərifə xanım Əliyevanın məzarı üstünə də güllər düzmüşlər.
Sonra nazirliyin əməkdaşları Şəhidlər xiyabanına gələrək Azərbaycanın müstəqilliyi və ərazi bütövlüyü uğrunda mübarizədə canlarından keçmiş qəhrəman Vətən övladlarının məzarları üzərinə tər çiçəklər düzmüşlər.
ETSN-də keçirilən tədbirdə çıxış edən ekologiya və təbii sərvətlər naziri Hüseyn Bağırov Prezident İlham Əliyevin rəhbərliyi ilə Azərbaycanda bütün sahələrdə olduğu kimi, ekologiya sahəsində də görülən işlərin, o cümlədən ətraf mühitin mühafizəsi istiqamətindəki tədbirlərin və layihələrin davam etdirildiyini diqqətə çatdırmış, aparılan ardıcıl ekoloji siyasət, qarşıda duran vəzifələr və perspektiv planlar barədə məlumat vermişdir.
Sonra nazir təbii sərvətlərdən səmərəli istifadə və ətraf mühitin mühafizəsi, bərpası və davamlı inkişafı sahələrində xüsusi xidmətlərinə görə nazirliyin 11 əməkdaşını ETSN-in Fəxri Fərmanı ilə təltif etmişdir.
Sonda yığıncaq iştirakçıları adından Prezident İlham Əliyevə müraciət qəbul olunmuşdur.
Bölmənin digər xəbərləri
