Ekoloji maarifləndirmə mühüm təbliğat vasitəsidir
Bakı, 24 may (AZƏRTAC). Azərbaycan Respublikası Dövlət Neft Şirkətinin (ARDNŞ) ekologiya idarəsi tərəfindən ekoloji təbliğat və maarifləndirmə məqsədilə mütəmadi işlər görülür.
ARDNŞ-in mətbuat xidmətindən AZƏRTAC-a bildirmişlər ki, may ayında Azərbaycan Gənclər İttifaqının, Norveç Təbiəti Mühafizə Cəmiyyətinin (SPARE) enerji və resurslardan istifadə üzrə Beynəlxalq məktəbli proqramının məktəbliləri üçün “Eko-park”a ekskursiya təşkil olunmuşdur. Eləcə də, ekologiya idarəsinin əməkdaşları Azərbaycan Gənclər İttifaqının Bakı şəhərində “Yaşıl məktəbim” layihəsinin yekun hesabat konfransında, 287 nömrəli “Zəkalar” liseyində “Tullantıların ikinci həyatı” mövzusunda tədbirdə iştirak etmişlər.
Mayın 16-da isə Bakı şəhərindəki 201 nömrəli tam orta məktəbin şagirdləri “Eko-park”da olmuşlar. Tədbir iştirakçılarına “Eko-park”ın yaradılma məqsədi, parkın istehsalat sahələri və infrastrukturu barədə, burada quraşdırılmış ətraf mühitin dostu olan texnologiyalar barədə məlumat verilmişdir. Şagirdlərə parkın qapalı şitilxana kompleksində yetişdirilən müxtəlif növ bitkilərin, bioekoloji xüsusiyyətləri və becərilmə üsulları haqqında geniş bilgilər verilmişdir.
Mayın 22-də Beynəlxalq Biomüxtəliflik Günü münasibətilə 132-134 nömrəli təhsil kompleksinin şagirdləri üçün “Eko-park”da tədbir təşkil olunmuşdur. Tədbirdə 132-134 nömrəli təhsil kompleksinin məktəblilərinin “Xəzər-suitilərini necə xilas edək” mövzusunda və ekologiya idarəsinin “ARDNŞ-in ekoloji layihələri haqqında” təqdimatları keçirilmişdir.
Tədbir iştirakçılarına idarənin hədiyyələri verilmiş və belə görüşlərin davamlı olması qərara alınmışdır.
Bölmənin digər xəbərləri
