Ekoloji parkda Avropa İttifaqının Azərbaycandakı nümayəndəliyinin əməkdaşları ilə görüş keçirilmişdir
Bakı, 13 iyul (AZƏRTAC). Qala qəsəbəsindəki “Ekoloji Park”da ARDNŞ-in Ekologiya İdarəsinin əməkdaşları ilə Avropa İttifaqının Azərbaycan Respublikasındakı nümayəndəliyinin layihə meneceri Amori Ost, proqram rəhbəri Pərviz Yusifov, enerji məsələləri üzrə müşavirlər Edita Novak və İnkeri Virtanen arasında görüş keçirilmişdir.
AZƏRTAC xəbər verir ki, görüşün məqsədinin “Eko-Park”la tanışlıq, bərpa olunan enerji sahəsində Avropa İttifaqı ilə Azərbaycan, o cümlədən ARDNŞ arasında əməkdaşlığın istiqamətləri haqqında fikir mübadiləsi aparmaq olduğu bildirilmişdir. Görüş zamanı qonaqlara ARDNŞ-də həyata keçirilən ekoloji layihələr haqqında təqdimat nümayiş olunmuş, bərpa edilən enerji mənbələri və enerji səmərəliliyi sahəsində görülmüş işlər və gələcək planlar barədə məlumat verilmişdir.
Avropalı qonaqlar həm də “Eko-park”ın fəxri qonaqları üçün ayrılmış ərazidə ağac əkmiş, qapalı və açıq şitilxana sahələrində becərilən və yerli şəraitə uyğunlaşdırılmış ağac-kol növləri, o cümlədən parkda qorunaraq çoxaldılan endemik, relikt, nadir və nəsli kəsilmək təhlükəsi olan bəzi bitki növlərinin çoxaldılma üsulları və bio-ekoloji xüsusiyyətləri ilə tanış olmuşlar. Qonaqlar Ekoloji Mərkəzin “Xatirə Kitabı”na ürək sözlərini yazmışlar.
Bölmənin digər xəbərləri
