Ekoloji qanunvericiliyin tələblərinə riayət etməyənlər cərimələnmişlər
Bakı, 23 iyul (AZƏRTAC). Ekologiya və Təbii Sərvətlər Nazirliyinin Ətraf Mühitin Mühafizəsi Departamentinin əməkdaşları iyulun 1-dən 15-dək ölkə ərazisində ekoloji qanunvericiliyin tələblərinə riayət olunmasını yoxlamaq məqsədi ilə araşdırma aparmışlar.
Nazirliyin mətbuat xidmətindən AZƏRTAC-a bildirmişlər ki, araşdırma zamanı su və torpaq ehtiyatlarının, atmosfer havasının, yerin təkinin, fauna və floranın mühafizəsi, o cümlədən ətraf mühitə qanunsuz məişət və istehsalat tullantılarının yerləşdirilməsi ilə bağlı bir sıra qanun pozuntuları aşkar edilmişdir. Qanunu pozanlara 82 akt və protokol tərtib olunmuş, nöqsanların aradan qaldırılması üçün 38 müddətli məcburi göstəriş verilmişdir.
Ümumilikdə isə 149 min 200 manat məbləğində cərimə tətbiq edilmiş, ətraf mühitə tullantıların atılmasına və axıdılmasına görə hüquqi və fiziki şəxslərə 12 min 490.02 manat məbləğində ödəmə tətbiq edilmişdir.
Tədbir görülməsi üçün hüquq-mühafizə orqanlarına 6, məhkəməyə 1, icra qurumlarına isə 25 iş göndərilmişdir.
Bölmənin digər xəbərləri
