Ekoloji qanunvericiliyin tələblərini pozanlara 137 min 900 manat məbləğində cərimə tətbiq olunmuşdur
Bakı, 5 iyul (AZƏRTAC). Ekologiya və Təbii Sərvətlər Nazirliyinin Ətraf Mühitin Mühafizəsi Departamentinin əməkdaşları iyunun 15-dən 30-dək ölkə ərazisində ekoloji qanunvericiliyin tələblərinə riayət olunmasını yoxlamaq məqsədi ilə araşdırma aparmışlar.
Nazirliyin mətbuat xidmətindən AZƏRTAC-a bildirmişlər ki, araşdırma zamanı su və torpaq ehtiyatlarının, atmosfer havasının, yerin təkinin, fauna və floranın mühafizəsində, o cümlədən ətraf mühitə məişət və istehsalat tullantılarının yerləşdirilməsində qanun pozuntuları aşkar edilmişdir. Yol verilmiş qanun pozuntularına görə 133 akt və protokol tərtib olunmuş, nöqsanların aradan qaldırılması üçün 49 müddətli məcburi göstəriş verilmişdir.
Ümumilikdə 137 min 900 manat məbləğində cərimə tətbiq olunmuş, ətraf mühitə dəymiş ziyana görə 2 min 457.67 manat məbləğində iddia qaldırılmış, ətraf mühitə tullantıların atılmasına və axıdılmasına görə hüquqi və fiziki şəxslərə 29 min 61.37 manat məbləğində ödəmə tətbiq edilmişdir. Tədbir görülməsi üçün hüquq mühafizə orqanlarına 8, icra qurumlarına isə 27 iş göndərilmişdir.
Bölmənin digər xəbərləri
