“Ekoloji tədrisin keyfiyyətinin artırılmasına yardım” layihəsinin birinci mərhələsi başa çatmışdır
Bakı, 19 iyul (AZƏRTAC). “Biosfer” İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə yardımı ilə “Ekoloji tədrisin keyfiyyətinin artırılmasına yardım” layihəsinin birinci mərhələsini uğurla başa çatdırmışdır.
İctimai Birlikdən AZƏRTAC-a bildirmişlər ki, layihə çərçivəsində ekspertlər tərəfindən ekoloji tədris proqramlarının və dərsliklərinin ekspertizası aparılmışdır. Bakı və Şirvan şəhərlərinin, Sabirabad rayonunun məktəblərində müşahidələr əsasında təhlillər aparılmış, ekoloji tədrisin keyfiyyətinin yüksəldilməsinə yönələn təkliflərin ilkin variantı hazırlanmış və “dəyirmi masa”lar keçirilmişdir. Tədbirlərdə ekoloji yönümlü fənləri tədris edən müəllimlər, regional təhsil idarələrinin əməkdaşları, Ekologiya və Təbii Sərvətlər Nazirliyinin əməkdaşları iştirak etmişlər.
Layihənin ikinci mərhələsində isə bu təkliflər təkmilləşdirilərək son variantı hazırlanacaqdır. Təkliflər mətbuat vasitəsi ilə ictimaiyyətə təqdim ediləcək, eyni zamanda, Təhsil Nazirliyinə göndəriləcəkdir.
Bölmənin digər xəbərləri
