Elçin Sultanov: Beşbarmaq dağında üç cür quş köçü görmək mümkündür
Bakı, 8 oktyabr, AZƏRTAC
Azərbaycanda quşların müşahidəsinə beynəlxalq səviyyədə sentyabrdan başlanılıb. Beşbarmaq dağında xarici nümayəndələr var. Onlar növbəli şəkildə fəaliyyət göstərirlər. Xarici nümayəndələr Beşbarmaq dağını quşların müşahidəsi üçün əlverişli yer hesab edirlər. Çünki dağ dənizə çox yaxındır. Burada üç cür köç görmək mümkündür. Dəniz qırağı ilə su quşları uçur. Bunu təkcə Beşbarmaqda deyil, Yaşma adasında da, Abşeronda da görmək mümkündür. Quru quşları isə dağların dənizdən uzaqlaşan ərazilərində enli cəbhə ilə uçurlar. Onları çox sayda bir yerdə görmək çox çətindir. Lakin Beşbarmaqda yırtıcıların da, sərçəkimilərin də köçünü görmək mümkündür.
Bunu AZƏRTAC-a müsahibəsində Azərbaycan Ornitoloji Cəmiyyətinin sədri, biologiya üzrə fəlsəfə doktoru Elçin Sultanov bildirib.
“Məlumdur ki, “Beşbarmaq dağı” Dövlət Tarix-Mədəniyyət və Təbiət Qoruğu elan olunub. Orada dəniz qırağında gələcəkdə quş müşahidəsi qülləsinin tikilməsi planlaşdırılır. Yırtıcıları elə dağın özündən müşahidə eləmək olar. Sərçəkimilər və su quşları isə aşağıdan uçur. Qülləni aşağıda tikib oradan müşahidə aparmaq mümkündür.
Qış fəslində Azərbaycanda quşları sayma prosesi həyata keçirildi. Bütün əsas quşların yığışma yerlərində sayma prosesi apara bildik. Nəticədə 800 mindən çox quş sayıldı. Əksəriyyəti su quşlarıdır. Onların içində ördək növləri üstünlük təşkil edir. Quru quşlar arasında isə birinci yerdə bəzgəkdir ki, onların sayı 100 mindən çoxdur. Hər il Ağcabədi rayonunda 50 minlik dəstəsi müşahidə olunur. Sayma prosesi nəticəsində “Qırmızı kitab”ın üçüncü nəşri üçün də yeni məlumatlar əldə etdik. Ümid edirik ki, sayma prosesi mütəmadi aparılacaq”, - deyə E.Sultanov qeyd edib.
Bölmənin digər xəbərləri
