Əlilliyi olan qadın və qızların ictimai xidmətlərə çıxışının təkmilləşdirilməsi ilə bağlı layihə yekunlaşıb
Bakı, 23 sentyabr, AZƏRTAC
Sentyabrın 23-də "Əlil Qadınlar Cəmiyyəti" İctimai Birliyinin 2022-2025-ci illəri əhatə edən "Bakı şəhəri, Gəncə şəhəri və Quba-Xaçmaz bölgəsində əlilliyi olan qadın və qızların ictimai xidmətlərə çıxışının təkmilləşdirilməsi" layihəsinin yekununa həsr olunmuş konfrans keçirilib.
AZƏRTAC xəbər verir ki, BMT-nin Qadınlara qarşı zorakılığın aradan qaldırılması üzrə Etimad Fondu tərəfindən maliyyələşdirilən layihə çərçivəsində həyata keçirilən fəaliyyətlər nəticəsində müxtəlif bölgələrdə yaşayan, əlilliyi olan qadın və qızların sosial xidmətlərə çıxış imkanları genişləndirilib, hüquqi bilikləri artırılıb və sosial inklüzivlik sahəsində mühüm irəliləyişlər əldə olunub.
Tədbir Azərbaycanın Dövlət Himninin səsləndirilməsi, ərazi bütövlüyümüz və suverenliyimiz naminə canlarından keçən qəhrəmanların əziz xatirəsinin bir dəqiqəlik sükutla yad edilməsi ilə başlayıb.
BMT-nin Azərbaycandakı rezident-əlaqələndiricisi Vladanka Andreeva 1986-cı ildə yaradılan Etimad Fondunun təkcə keçən il təqribən 14 milyon insanı əhatə etdiyini diqqətə çatdırıb: "Azərbaycan da qlobal xəritənin bir hissəsidir. Həmin fond 40 minə qədər qadın və qızları dəstəkləyib, onların parlamasına və müxtəlif imkanlara çıxış əldə etməsinə kömək edib. Qadınlara qarşı zorakılıq hər üç qadından birinə təsir edir. Əlil qadın və qızların zorakılıqla üzləşməsi halları bundan 2-3 dəfə çoxdur. Bir əl əlil qadın və qızların güclənməsinə, onların imkanlara çıxış əldə etməsinə kömək etməlidir, digər yandan inklüziv cəmiyyətin qurulmasına dəstək göstərilməlidir. Bu layihə çərçivəsində daha çox qadın və qızlar öz hüquqları barədə maariflənmiş oldular. Onlar nə qədər maariflənsələr, bir o qədər də ictimai xidmətlərə çıxış əldə etmiş olarlar. Belə layihələr nəticəsində cəmiyyətdə qadın və qızlara qarşı olan stereotiplər də aradan qalxmağa, birgə cəmiyyət formalaşmağa başlayır".
Daha sonra çıxış edən layihənin rəhbəri, “Əlil Qadınlar Cəmiyyəti” İctimai Birliyinin sədri Məhluqə Rəhimova bildirib ki, 3 il davam edən layihə zamanı dövlət qurumlarının əməkdaşlarına etik təlimlər, əlilliyi olan şəxslərə isə hüquqlarını aşılamaq üçün seminarlar keçirilib. 24 dövlət qurumu ilə koordinasiya şurası qurulub, mobil dəstək proqramı yaradılıb. "Layihə Bakı və Gəncə şəhərlərini, o cümlədən Quba, Qusar və Xaçmaz rayonlarını əhatə edib. 4 min 500-dən çox əlilliyi olan qadın və qız həmin proqramdan bəhrələniblər. Əlilliyi olan qadın və qızların problemləri ilə əlaqəli olan qurumların iştirakı ilə videotəlimat hazırlanıb. BMT-nin Baş İdarəsi həmin videotəlimatdan dünya çərçivəsində istifadə üçün müraciət edib. Həmçinin biz üç kitab nəşr etdirdik. Həmin kitablardan bütün əlilliyi olan insanlar istifadə edə bilərlər. Biz həmin layihə çərçivəsində 500 əlilliyi olan qadın və qız arasında sorğular keçirdik. Böyük işlər görüldü. Bizimlə birgə fəaliyyət göstərən qurumlara minnətdaram. Düşünürəm ki, koordinasiya şurasında birləşən, təlimlərdə iştirak edən, bizimlə birgə olan dövlət qurumları bundan sonra da əlilliyi olan qadınların yanında olacaqlar", - deyə M.Rəhimova vurğulayıb.
Etika Akademiyasının direktoru Günel İbrahim "Əlilliyi olan şəxslər ilə peşəkar etik ünsiyyət qaydaları", təlim üzrə mütəxəssis İradə Rizazadə "Hüquqi maarifləndirmə, sosial dəstək və gücləndirmə" mövzularında təqdimatla çıxış ediblər.
"Əlil Qadınlar Cəmiyyəti” İctimai Birliyinin mətbuat xidmətinin rəhbəri Elnarə Dərziyevanın sözlərinə görə, layihə minlərlə qadın və qızın həyatında real dəyişikliklərə səbəb olub. “Onlar dövlət qurumlarına müraciət edərkən artıq daha hörmətli münasibət görür və daha rahat xidmət alırlar. Bu, onların cəmiyyətdə özünəinamını artırır. Layihə cəmiyyətimizdə stereotiplərin qırılmasına və əlilliyi olan qadınların yalnız yardım alan deyil, ictimai həyatın fəal üzvü kimi qəbul edilməsinə töhfə verib. İctimai müzakirələrdə, dəyirmi masalarda, eləcə də media məhsulları tərəfindən bu mövzu gündəmdə saxlanılıb. Ən mühüm nailiyyətlərdən biri dövlət qurumlarında etik ünsiyyət standartlarının tətbiqinə başlanması olub. 692-dən çox dövlət qulluqçusu və sosial xidmət işçisi bu təlimlərdən faydalanıb, onların 295-i bacarıqlarında ciddi irəliləyiş olduğunu təsdiqləyiblər. Bu layihə yalnız üç illik təşəbbüs deyil, gələcək üçün davamlı modelin başlanğıcıdır. Bakıda, Gəncədə və Qubada yaradılmış Koordinasiya Şuraları fəaliyyətini davam etdirəcək və əlilliyi olan qadınların səsini dövlət orqanlarına çatdırmağa davam edəcək. Hazırlanmış təlimat kitabçaları və metodik vəsaitlər artıq bəzi qurumlarda tətbiq olunmağa başlayıb. Həmin modelin ölkə üzrə genişləndirilməsi, bütün regionlarda qadın və qızların xidmətlərə bərabər çıxışının təmin edilməsi vacibdir. Əlavə olaraq, bu üçillik layihə çərçivəsində bizə ölkədə fəaliyyət göstərən çox sayda media qurumları dəstək olub. 300-ə yaxın məlumat hazırlanaraq informasiya agentliklərində yayımlanıb. Bununla yanaşı, hər il görülən işlərlə bağlı televiziya proqramı hazırlanaraq yayımlanıb. Ölkə üzrə təqribən 20 min izləyici bu maarifləndirici verilişlərdən yararlanıb", - deyə o vurğulayıb.
Daha sonra layihəyə dəstək göstərmiş tərəfdaş qurumlar mükafatlandırılıb. Bu çərçivədə AZƏRTAC da təltifə layiq görülüb.
Tədbirdə layihə çərçivəsində hazırlanmış videotəlimat da nümayiş etdirilib.
Bölmənin digər xəbərləri
