Əlilliyi olan şəxs: Dövlətin göstərdiyi diqqət və qayğını həyatımda hiss edirəm
Bakı, 11 fevral, Günel Türksoy, AZƏRTAC
Bir ildən artıqdır ki, Dövlət Məşğulluq Agentliyi tərəfindən mənə döşəmə və parket cilalanması xidməti ilə məşğul olmaq üçün
lazımi avadanlıqlar təqdim olunub. Mən II qrup əliləm, dövlətimizin əlilliyi olan şəxslərə göstərdiyi diqqət və qayğını həyatımda birbaşa hiss edirəm. Verilən dəstək mənim üçün sadəcə avadanlıqdan ibarət deyil, bu, yeni imkan və başlanğıcdır. Həmin avadanlıqlar sayəsində ailəmə sabit maddi qazanc gətirə bildim. Ailəliyəm, iki övladım var və ata olaraq onların ehtiyaclarını qarşılaya bilmək mənim üçün çox önəmlidir. Dövlətin yaratdığı bu şərait mənə həm maddi, həm də mənəvi güc verdi. Özümü cəmiyyət üçün faydalı və işgüzar hiss etdim.
Bunu AZƏRTAC-a açıqlamasında Dövlət Məşğulluq Agentliyinin ötən il işlə təmin etdiyi II qrup əlil Fərhad Məstiyev bildirib.
Fərhad Məstiyev bağlanılan müqavilənin müddəti bitdikdən sonra yenidən onunla əlaqə saxlanıldığını və istifadə etdiyi avadanlıqların rəsmi şəkildə adına keçirildiyini bildirib: “Bu da dövlətin bizə göstərdiyi etimadın göstəricisidir. Hazırda əsasən paytaxtda və Bakıya yaxın ərazilərdə evlərdə, yeni tikililərdə döşəmə və parket cilalanması işlərini həyata keçiririk. Qış aylarında işlər bir qədər zəifləsə də, yay mövsümündə müraciətlərin sayı xeyli artır. Bu da fəaliyyətimizi daha da genişləndirməyə imkan yaradır. Əvvəllər də müəyyən avadanlıqlarım var idi, lakin onlar köhnə idi və standartlara tam cavab vermirdi. Dövlət tərəfindən verilən yeni avadanlıqlar isə müasir, keyfiyyətli və standartlara uyğundur. Bu da gördüyümüz işin keyfiyyətinə birbaşa təsir göstərir və müştəri məmnuniyyətini artırır”.
Xəzər rayonunun Şüvəlan qəsəbəsində yaşadığını bildirən Fərhad Məstiyev daha sonra deyib: “Bu gün ailəmin dolanışığını halal zəhmətimlə təmin edirəmsə, bu işdə Dövlət Məşğulluq Agentliyinin dəstəyi böyük rol oynayır. Dövlətimizin əlilliyi olan şəxslərə göstərdiyi diqqət və qayğı bizə cəmiyyətə daha fəal şəkildə qoşulmaq, öz gücümüzə inanmaq və gələcəyə ümidlə baxmaq imkanı yaradır. Bizə bu şəraiti yaratdığı üçün Dövlət Məşğulluq Agentliyinə minnətdarlığımı bildirirəm”.
Bölmənin digər xəbərləri
