-Möhtərəm cənab Prezident!

Hesabat dövründə Əmək və Əhalinin Sosial Müdafiəsi Nazirliyi Sizin siyasi kursunuza uyğun olaraq qarşımıza qoyduğunuz vəzifələrin icrası üzrə müvafiq tədbirlər həyata keçirmişdir. MDB-də ilk dəfə Azərbaycan Respublikası Prezidentinin müvafiq Sərəncamı ilə təsdiq edilmiş məşğulluq strategiyasının həyata keçirilməsi üzrə Dövlət proqramı fəal ünvanlı məşğulluq tədbirlərinin yerinə yetirilməsində, işsizliyin və nəticə etibarilə yoxsulluğun səviyyəsinin aşağı salınması üçün yeni imkanlar yaratmışdır.

Həyata keçirdiyiniz uğurlu siyasət nəticəsində ölkəmizdə işsizlik səviyyəsi 2003-cü ilə nisbətən 4,1 faiz azalaraq, 2007-ci ilin noyabr ayına 6,6 faiz təşkil etmişdir. Məlumat üçün bildirirəm ki, Avropa İttifaqı ölkələrində bu göstərici 8,1 faizdir. 2007-ci ildə məşğulluq xidməti orqanları tərəfindən 30 min 700 nəfər münasib işlə təmin olunmuşdur ki, bu da ötən ilin müvafiq dövrü ilə müqayisədə 8,5 faiz çoxdur. Bununla belə, yeni iş yerlərinin yaradılmasının sürətli artımı fonunda ixtisaslı işçi qüvvəsinə tələbat çoxalmış, məşğulluq xidmətinə fəhlə peşələri üzrə təqdim olunan vakansiyalar son dörd ildə dəfələrlə artmışdır.

İş axtaran və işsiz vətəndaşların peşə hazırlığı işini əmək bazarının real tələblərinə uyğun təşkil etmək məqsədi ilə ilk dəfə keçən il Bakı şəhərində regional tədris mərkəzi yaradılmışdır. Qısa müddət ərzində 650 vətəndaş burada əmək bazarının tələblərinə uyğun peşələrə yiyələnmiş və onların 95 faizi işlə təmin edilmişdir. Tezliklə bu tipli tədris mərkəzləri Naxçıvanda və Göyçayda fəaliyyətə başlayacaqdır. Beynəlxalq təcrübə göstərir ki, burada təhsilin model sisteminin tətbiqi nəticəsində təlim müddəti 2, təlim xərcləri isə 2,5 dəfə azdır. Məşğulluq problemlərinin həllində başlıca istiqamətlərdən biri də vakant iş yerlərinə Azərbaycan vətəndaşlarının üstün hüququnun təmin olunması və bu məqsədlə daxili əmək bazarının qeyri-leqal əməkçi miqrantlardan səmərəli qorunmasından ibarətdir.

Nazirlər Kabinetinin 2007-ci il yanvar ayının 22-də keçirilən geniş iclasındakı nitqinizdən irəli gələn vəzifələrin icrası olaraq ölkəmiz əcnəbilər üçün cəlbedici ölkəyə çevrildiyindən gözlənilən əməkçi miqrant axınının tənzimlənməsinə nail olmaq məqsədi ilə nazirlik tərəfindən bir sıra müvafiq işlər həyata keçirilmişdir. Belə ki, əmək miqrasiyası proseslərinin tənzimlənməsi işinin respublikamızın qoşulduğu beynəlxalq konvensiyalara və inkişaf etmiş ölkələrin təcrübəsinə əsaslanaraq bu sahədəki milli qanunvericiliyin təkmilləşdirilməsi üzrə zəruri təkliflər hazırlanmış və Nazirlər Kabinetinə təqdim edilmişdir.

Məlumat üçün bildirmək istərdim ki, əcnəbilərə fərdi icazənin alınmasına görə işəgötürənlər tərəfindən ödənilən dövlət rüsumunun məbləği cəmi 44 manat təşkil edir. Bu isə sahibkarları milli əmək bazarına keyfiyyətsiz və ucuz əcnəbi işçi qüvvəsini cəlb etməyə stimullaşdırır. Problemin aradan qaldırılması məqsədi ilə yeni müvafiq təkliflər hazırlanır. Əmək qanunvericiliyinin pozulmasına görə məsuliyyətin gücləndirilməsi ilə bağlı ötən ilin sonunda qəbul edilmiş qanun əcnəbilərin işə qəbulu sahəsində də işəgötürənlərin məsuliyyətini artırmışdır.

2007-ci ilin sonunda müvafiq fərdi icazə əsasında respublikamızda işləyən əcnəbilərin sayı 1783 nəfər olmuşdur ki, bu da ötən ildəkindən 35 faiz çoxdur. Bununla belə, bu rəqəm daxili əmək bazarında iştirak edən əcnəbilərin real sayından dəfələrlə azdır. Sizi əmin edirəm ki, bu sahədə görülən tədbirlər öz müsbət nəticələrini verəcəkdir.

Möhtərəm cənab Prezident!

“Azərbaycan Respublikasında tikinti sahəsində dövlət nəzarətinin gücləndirilməsi haqqında” Sizin Fərmanınızdan irəli gələn vəzifələr uğurla yerinə yetirilir, əmək qanunvericiliyinin tələblərinin pozulması ilə bağlı aşkar edilmiş nöqsanların aradan qaldırılması üçün müəssisə rəhbərlərinə icrası məcburi olan 159 göstəriş verilmiş, 10 min 917 nəfərlə əmək müqaviləsi bağlanması təmin edilmiş, əmək haqqı səviyyəsi reallığa uyğun olmayan 5 min 754 nəfər işçinin əmək müqavilələrində müvafiq qaydada dəyişikliklər edilərək əmək haqları artırılmışdır. Bununla yanaşı, aparılan maarifləndirmə işləri nəticəsində bir çox işəgötürənlər öz təşəbbüsləri ilə işçilərlə əmək münasibətlərini qanunvericiliyin tələblərinə uyğunlaşdırmışlar. Bu isə özəl sektorda sosial məsuliyyətin artmasına təkan vermişdir.

Möhtərəm cənab Prezident!

Hazırda 78 min 92 ailəyə və ya 364 min 59 nəfərə ünvanlı dövlət sosial yardımı verilir. Bütövlükdə ölkəmizi əhatə edən korporativ kompyuter şəbəkəsində müraciət edən ailələr haqqında geniş məlumat bankı yaradılmışdır. Məqsəd bu məlumatlar əsasında hazırlanacaq layihələrlə vətəndaşları yoxsulluq həddindən çıxarmaqdır. Ailələrin yoxsulluq şəraitində yaşamalarına təsir edən amillərin aradan qaldırılması üçün “Aztəminatlı ailələrin sosial reabilitasiyası” adlı proqram hazırlanmış və dörd rayonda pilot layihə kimi sınaqdan keçirilir.

Hesabat dövründə əlillərin sosial müdafiəsinin gücləndirilməsi, bərpa vasitələri ilə təchizatı, onlara avtomaşın və mənzillərin verilməsi istiqamətində işlər davam etdirilmişdir. Sizin tapşırığınıza əsasən əlillərə paylamaq üçün respublikaya 404 ədəd “Oka” markalı avtomobil gətirilmişdir. Əlil və şəhid ailələri üçün 2006-cı ildə 434 mənzil, 2007-ci ildə 943 mənzil tikilib istifadəyə verilmişdir. 2008-ci ildə daha 1103 əlil və şəhid ailəsinin mənzillə təmin olunacağı proqnozlaşdırılır.

Möhtərəm cənab Prezident!

Sizin siyasi kursunuza uyğun olaraq, beynəlxalq əməkdaşlıq çərçivəsində fəaliyyətimizi daha da genişləndiririk. İstər beynəlxalq təşkilatlar, istərsə də xarici ölkələrin aidiyyəti dövlət qurumları ilə inkişaf etdirdiyimiz əlaqələr qarşımızda yeni-yeni imkanlar açır. İl ərzində İtaliya, Almaniya, Türkiyə, Rusiya, İsveç, Macarıstan və Filippinin aidiyyəti orqanları ilə müxtəlif sahələrdə əməkdaşlığa dair müvafiq prosedur sənədləri imzalanmışdır.

Nazirliyin institusional potensialının gücləndirilməsi məqsədi ilə sosial sahədə yeni layihələrin hazırlanması üçün Dünya Bankı ilə razılıq əldə edilmişdir. Bu layihə nazirliyin bütün struktur bölmələrində müasir dövrün tələblərinə uyğun islahatların aparılmasını nəzərdə tutur.

Möhtərəm Prezident, çıxışımın sonunda Sizi əmin edirəm ki, əhalinin sosial rifahının və həyat səviyyəsinin durmadan yüksəlməsi üzrə müəyyən etdiyiniz vəzifələrin layiqincə icra olunması üçün bütün potensialımızı səfərbər edəcəyik.

Diqqətinizə görə sağ olun.