Ermənistan törətdiyi müharibə cinayətlərinə görə cavab verməlidir
Bakı, 26 mart, AZƏRTAC
Ermənistan xristianlıq da daxil olmaqla, bütün dinlərin prinsiplərini kobud şəkildə pozur. İslam məscidləri təhqir olunur, məqsədli şəkildə dağıdılır, alban kilsələri saxtalaşdırılır, kilsələr hərbçilərin cinayətkar məqsədləri üçün istifadə olunur. Belə bir yanaşma ilə mədəni-dini irsin qorunmasından danışmaq, sadəcə olaraq, riyakarlıqdır. Bu mənada Cəbrayılda 2012-2017-ci illərdə hərbçilər tərəfindən elə hərbçilər üçün inşa olunan və xristian dininə heç bir aidiyyəti olmayan, daha çox cəbbəxana kimi istifadə edilən kilsənin sökülməsi ətrafında ermənilərin şou yaradacağı gözlənilən idi. Lakin bu ittihamların heç bir hüquqi əsası yoxdur. Bu cür tikililər işğal rəmzlərindən başqa bir şey deyildir. Amma Ermənistanın Qarabağda və indiki Ermənistan ərazisində Azərbaycana məxsus mədəni irsə qarşı törətdikləri vandallıq aktları birbaşa müharibə cinayətidir.
AZƏRTAC xəbər verir ki, bu fikirləri Milli Məclisin deputatı Könül Nurullayeva bildirib.
K.Nurullayeva qeyd edib ki, bu baxımdan fəaliyyətini bəşəri miqyasda mədəni irsin mühafizəsi istiqamətində quran UNESCO-nun yalnız Qarabağda deyil, Ermənistan ərazisində də monitorinq aparmasına ehtiyac vardır. Çünki Ermənistan Qarabağda olduğu kimi, burada da məqsədli şəkildə sözügedən ərazilərin tarixi və əzəli sakinləri olan azərbaycanlıların izlərini silir, Azərbaycan xalqının mədəni irsinin mənşəyini dəyişdirir.
Bu mənada Azərbaycan ziyalılarının UNESCO-nun Baş direktoru Odri Azuleyə indiki Ermənistan ərazisində ölkəmizə məxsus mədəni irsin yox olma təhlükəsi ilə bağlı ünvanladığı müraciət bir çox tarixi faktların araşdırılması üçün imkan yaradır. Məktubda qeyd edildiyi kimi, Ermənistanda yaşamış və bu yerlərin köklü sakinləri olan azərbaycanlılara qarşı XX əsrin əvvəllərindən etibarən aparılmış etnik təmizləmə siyasəti nəticəsində soydaşlarımız öz dədə-baba torpaqlarından kütləvi deportasiyaya məruz qalıb. 1988-ci ildə - sonuncu deportasiya zamanı 250 mindən çox azərbaycanlı öz doğma yurdlarından qovularaq qaçqına çevrilib. Təsadüfi deyil ki, İrəvan quberniyasında 300-dən çox məscid XX əsrin əvvəllərində qəsdən dağıdılıb, özününkiləşdirilib və ya digər məqsədlərlə istifadə edilib. Ermənistanda azərbaycanlılara məxsus 500-dən çox qəbiristanlıq məhv edilib. Bu məzarlar arasında Azərbaycanın aşıq sənətinin görkəmli nümayəndəsi Aşıq Ələsgərin də qəbirüstü abidəsi var.
Deputat Azərbaycan aşıq sənətinin bəşəriyyətin qeyri-maddi mədəni irs nümunələri siyahısına salındığını diqqətə çatdıran deputat UNESCO-nun aşıq sənətinin nümayəndəsinə qarşı bu qeyri-insani davranışa xüsusi həssaslıqla yanaşmasının vacibliyini vurğulayıb. O deyib: “Bu yanaşma Ermənistanın heç bir ümumbəşəri dəyəri tanımadığını bir daha təsdiqləyir. Həyata keçirilən bu vandallıq aktları bir daha Ermənistanda terrorun dövlət siyasəti olduğunu təsdiqləyir. Bu illər ərzində cəzasız qalan Ermənistan terrorun coğrafiyasını daha da genişləndirib. Ermənistanın sərgilədiyi terror və vandallıq aktları həm də Azərbaycan xalqına qarşı mövcud olan dözümsüzlüyün nümunəsidir. Bu, eyni zamanda, beynəlxalq humanitar hüququn, xüsusən də 1949-cu il Cenevrə Konvensiyalarının, UNESCO-nun 1954 və 1970-ci il konvensiyalarının kobud şəkildə pozulmasıdır. Ermənistan törətdiyi bu müharibə cinayətlərinə görə Ermənistan cavab verməlidir”.
K.Nurullayeva Ermənistanda Azərbaycan xalqına məxsus olan mədəni irsin hazırkı vəziyyətinin da narahatçılıq yaratdığını diqqətə çatdırıb. Qeyd edib ki, orada elə bəşəri dəyərlər var ki, onların aqibəti UNESCO kimi nüfuzlu təşkilatları da narahat etməlidir. UNESCO ətraflı hesabat təqdim etmək məqsədilə Ermənistan hökumətinə rəsmi sorğu göndərməsi, Azərbaycan xalqının əsrlərlə tarixi olan mədəni və tarixi irsinin hazırkı vəziyyətinin qiymətləndirilməsi üçün Ermənistana ekspert qrupunun göndərilməsini təmin etməsi məqsədəuyğun olardı.
“Ermənistanın Cəbrayılda cəbbəxana məqsədilə inşa və istifadə etdiyi kilsə ətrafında yaratdığı hay-küy isə 30 il ərzində həyata keçirdikləri vandallıq aktlarının arxa plana keçməsinə hesablanıb. Amma bu faktların sübuta yetirilməsi üçün sadəcə obyektiv şəkildə faktaraşdırıcı missiyalar təşkil etmək kifayətdir”, - deyə deputat fikirlərini yekunlaşdırıb.
Bölmənin digər xəbərləri
