Bakı, 26 dekabr, AZƏRTAC

Son illər Azərbaycanda idmanın sürətlə inkişaf edən növlərindən biri də stolüstü tennisdir. Azərbaycan stolüstü tennisçilərinin IV İslam Həmrəyliyi Oyunlarında qazandıqları nailiyyətlər ölkəmizdə idmanın bu növünün kütləviliyinin daha da artmasına böyük təkan verdi.

Azərbaycan Stolüstü Tennis Federasiyasının vitse-prezidenti Fazil Məmmədov ilin yekunları, eləcə də stolüstü tennisçilərimizin uğurlu çıxışları barədə AZƏRTAC-ın müxbirinin suallarını cavablandırıb.

- Fazil müəllim, Azərbaycanda stolüstü tennisin inkişafı istiqamətində federasiya tərəfindən hansı işlər görülür?

- Azərbaycanda idmanın bütün növləri kimi, stolüstü tennisin də inkişafı üçün dövlətimiz tərəfindən hər cür şərait yaradılıb. 2014-cü ilin fevralından Şahin Mustafayev Stolüstü Tennis Federasiyasına rəhbərlik edir. Federasiya işini İnkişaf planına müvafiq olaraq həyata keçirir. Plan üzrə əsas istiqamətlər kütləviliyin, mütəxəssislərin peşəkarlığının artırılması, yığma komandanın inkişafı, peşəkar klubların inkişafıdır. Bütün istiqamətlər üzrə kompleks tədbirlər həyata keçirilir. Yığma komandanın maddi-texniki bazası qısa vaxtda gücləndirilib. “Şüa” İdman Sağlamlıq Mərkəzində icarəyə götürülən zal tam komplektləşdirilərək idmançıların istifadəsinə verilib. Bundan əlavə, Sumqayıtda, Dənizkənarı Parkda müasir idman kompleksi tikilib.

Klub sistemini təbliğ etmək üçün Federasiyanın dəstəyi ilə “Qarabağ NN” Stolüstü Tennis İdman klubu təsis olunub. İlk dəfə olaraq yeniyetmələr arasında liqa çempionatlarına start verilib. Veteranlar arasında liqa çempionatına hazırlıq işləri davam etdirilir. Təqvim planına müvafiq olaraq hər il 30-dan yuxarı müxtəlif səpkili tədbirlər keçirilir.

- İdmanın bu növü üzrə son vaxtlar hansı nailiyyətlər əldə olunub? Məsələn, ötən ay Azərbaycan stolüstü tennisinin tarixində ilk dəfə olaraq 2018-ci ildə keçiriləcək Yeniyetmələrin Olimpiya Oyunlarına lisenziya qazanıldı. Bu uğuru necə qiymətləndirirsiniz? Oyunlara əlavə lisenziyanın qazanılmasını gözləyirsinizmi?

- Son illərə nəzər salsaq, idmançılarımız 2015-ci ildə beynəlxalq turnirlərdə üç qızıl, iki gümüş və üç bürünc, 2016-cı ildə iki gümüş və üç bürünc, bu il isə dörd qızıl, yeddi gümüş və altı bürünc medal qazanıblar. Bildiyiniz kimi, bir qız tennisçimiz 2018-ci il Yeniyetmələrin Olimpiya Oyunlarına lisenziya qazanıb. 2018-ci ildə Çexiyanın Xodonin şəhərində növbəti lisenziya oyunu keçiriləcək ki, bu yarışda da lisenziya qazanmağa iddialıyıq. Bu nəticələri çox yüksək qiymətləndirirəm. Bu, müstəqil Azərbaycanın stolüstü tennis idmanı tarixində ilk belə nəticələrdir.

- Ölkəmizdə yeniyetmə və gənclər arasında stolüstü tennisə maraq hansı səviyyədədir? Yeni idmançıların yetişdirilməsi istiqamətində nə kimi tədbirlər reallaşdırılır?

- Nailiyyətlərimiz artdıqca bu idman növünə maraq da artır. Kütləviliyin artırılması və bu idman növünə yeni idmançıların cəlb edilməsi üçün müxtəlif tədbirlər həyata keçirilir. Hər ayın son şənbə günü Dənizkənarı Bulvarda, “28 Mall”, “Gənclik Mall” ticarət və əyləncə mərkəzlərində tennis festivalı təşkil olunur. Bu tədbirlərdə müxtəlif şoular, viktorinalar təşkil edilir ki, maraq göstərən izləyicilərə tennis topları, raketkaları hədiyyə edilir və tennislə məşğul olmaq üçün ünvanlar barədə bukletlər paylanılır.

Müxtəlif peşə sahibləri arasında da tennis yarışları təşkil olunur. Respublikanın 11 rayon və şəhərində 6-9 yaşında uşaqlarla məşğul olmaq üçün 30-a yaxın məşqçi-müəllimlərlə müqavilələr bağlanılıb.

Bundan başqa, beynəlxalq səviyyəli idmançıların və mütəxəssislərin hazırlanması, təlim-məşq proseslərinin daha səmərəli təşkili, peşəkarlıq səviyyələrinin artırılması, yığma komandanın gücləndirilməsi məqsədilə Çindən dəvət olunan məşqçi yeniyetmə, o cümlədən yığma komanda üzvləri ilə artıq fəaliyyətə başlanılıb.

- 2017-ci il başa çatır. Bu il ərzində Federasiyanın fəaliyyəti, idman yekunları ilə bağlı fikrinizi bilmək maraqlı olardı.

- İlin idman yekunlarından danışarkən qeyd etməliyəm ki, bu il idmançılarımız bir sıra ciddi uğurlar qazanıblar. Belə ki, fevralın 8-12-də Çexiyada 36 ölkədən 301 idmançının iştirak etdiyi açıq çempionatda oğlanların şəxsi oyunlarında idmançılarımız bir qızıl və bir gümüş medala sahib olublar. Fevralın 15-19-da 27 ölkədən 205 idmançının qatıldığı Fransa açıq çempionatında şəxsi oyunlarda bir qızıl, komanda hesabında isə qızlarımız qızıl, oğlanlarımız gümüş medala layiq görülüblər.

Bundan başqa, fevralın 22-24-də İsveç Orebro şəhərində keçirilən, 38 ölkədən 320 idmançının iştirak etdiyi açıq çempionatda qızların şəxsi oyunlarında komandamızın aktivinə bir bürünc, qoşa yarışlarda isə bir gümüş medal yazılıb.

Fevralın 24-26-da İsveçdə gənclər arasında 45-ci Safir Beynəlxalq turnirində şəxsi oyunlarda 18 yaşlı idmançıların mübarizəsində qızlarımız şəxsi yarışda ikinci yeri tutublar. Oğlanlarımız isə üçüncü yerə çıxıblar. Bu yarışda 21 yaşlı idmançılar arasında qızların şəxsi mübarizəsində iki təmsilçimiz bürünc medal qazanıb.

Stolüstü tennisçilərimiz il ərzində ən mühüm nailiyyətlərdən birini Bakıda yüksək səviyyədə keçirilən IV İslam Həmrəyliyi Oyunlarında əldə ediblər. İslamiadada stolüstü tennisçilərimiz iki gümüş və iki bürünc medal qazanıblar.

Bundan başqa, iyulun 14-24-də Portuqaliyanın Gimaraeş şəhərində 44 ölkədən 520 atletin iştirak etdiyi gənclərin Avropa çempionatında qızların şəxsi yarışında Azərbaycan idmançısı qızıl medal qazanaraq çempion olub. Stolüstü tennisçilərimiz qoşa yarışlarda ikinci, komanda yarışlarında isə üçüncü yeri tutaraq bir bürünc medal qazanıblar.

İlin sonuncu yarışında - noyabrın 3-6-da Xorvatiyanın Split şəhərində keçirilən Olimpiya Oyunlarının Avropa təsnifat turnirində qız idmançımız 2018-ci ildə Buones-Ayresdə təşkil olunacaq Yeniyetmələrin Olimpiya Oyunlarına lisenziyanı təmin edib.

- Sonuncu sualımız planlarla bağlıdır. Azərbaycanda stolüstü tennis üzrə hər hansı irimiqyaslı turnirin keçirilməsi nəzərdə tutulubmu?

- Stolüstü tennis üzrə ilk dəfə ölkəmizdə 2015-ci ildə Avropanın ən güclü idmançıları arasında “Top-16” turniri təşkil olunub. Bu yarışda Avropanın 17 ölkəsindən idmançılar iştirak ediblər.

Qarşıdakı yarışlara gəldikdə, gələn il ulu öndər Heydər Əliyevin 95 illik yubileyi münasibətilə stolüstü tennis üzrə beynəlxalq turnirin keçirilməsi planlaşdırılır. Ümid edirik ki, tennisçilərimiz bu turnirdə mühüm uğur qazanacaqlar.