Bakı, 27 sentyabr, AZƏRTAC

27 sentyabr şəhidlərimizin Anım Günüdür. Bu gün hər anı qəhrəmanlıqlarla dolu müqəddəs xatirə günüdür. Şanlı tariximizdə şəhid qanı ilə yazılmış hünər və rəşadət səhifəsidir. 2020-ci ilin həmin günündə başlanan 44 günlük Vətən müharibəsində mənfur Ermənistanın 30 ilə yaxın işğal altında saxlamış əzəli tarixi torpaqlarımız hərbi-siyasi yolla azad edildi. Torpaq, yurd sevgisinin ağırlığını çiyinlərinə götürmüş Azərbaycanın oğul və qızları bu Vətən imtahanından da ləyaqətlə çıxdılar. Qədirbilən xalqımız mənfur Ermənistanın işğalı altında olan torpaqlarımızın şəhid və qazilərimizin qanı və canı bahasına azad olunduğunu heç vaxt unutmayacaq. Hər bir vətəndaşımız üçün, bütün dünya azərbaycanlıları üçün tarixi zəfərimiz qürur mənbəyidir.

Bu sözləri AZƏRTAC-a açıqlamasında Azərbaycan Alpaqut Federasiyasının prezidenti, idman siyasəti üzrə ekspert Qüdrət Nuriyev deyib.

Vətən müharibəsindəki şanlı qələbəmizdən ötən 3 il ərzində xalqımızın müzəffər xalq kimi yaşadığını, bu qürurverici amilin bizimlə bundan sonra əbədi olacağını bildirən Qüdrət Nuriyev qeyd edib ki, hər birimiz öz fəaliyyətimizdə bu müqəddəs Zəfərə layiq olmalıyıq: “İkinci Qarabağ müharibəsində müasir dövrümüzün yeni qəhrəmanları - gənclərimiz böyük şücaət göstərib, adlarını tariximizə əbədi yazdılar. Gücü, qüdrəti ilə dünyaya səs salan müasir Azərbaycan gəncləri bütün sahələrdə, o cümlədən idmanda yüksək nailiyyətlər qazanmağa böyük səy göstərirlər. İdmançılarımız beynəlxalq yarışlarda qalib ölkənin təmsilçiləri kimi böyük əzmlə mübarizə apararaq mətin, yenilməz xalq olmağımızın həqiqətini bir daha təsdiqləyirlər. Onlar sübut edirlər ki, Azərbaycan gənclərinin döyüş meydanında da, nüfuzlu idman arenalarında da bayrağımızı qaldırmaq üçün güclü potensialı var.

Ötən həftə Serbiyanın paytaxtı Belqradda keçirilən dünya çempionatında yunan-Roma güləşi üzrə üçqat dünya çempionu tituluna sahib olan Eldəniz Əzizli qələbəsini Azərbaycan hərbçilərinə həsr etdiyini bildirdi. O qeyd etdi ki, Ordumuz döyüş meydanında, atletlərimiz idman arenasında qələbə qazanırlar. Yunan-Roma güləşi üzrə millimiz həm medalların əyarına, həm də toplanan xallara görə dünya çempionatlarında birinci olmaqla ölkəmizin güləş yığmaları tarixində ən böyük uğurunu qazandı. Şübhəsiz, Azərbaycan Prezident, Müzəffər Ali Baş Komandan İlham Əliyevin rəhbərliyi ilə Qarabağ iqtisadi rayonunda keçirilən lokal xarakterli antiterror tədbirlərində Ordumuzun böyük şücaət, peşəkarlıq göstərməsi, öz üzərinə düşən missiyanı şərəflə yerinə yetirməsi komandamıza yenilməz mübarizə ruhu bəxş etdi.

Elə həmin günlərdə Bakıda keçirilən “Böyük dəbilqə” turnirində cüdoçularımız da möhtəşəm tarix yazdılar. Tatami ustalarımız Ümummilli Lider Heydər Əliyevin 100-cü ildönümünə həsr olunan yarışda 3 qızıl, 1 gümüş və 1 bürünc medal qazanaraq ümumi hesabda və kişilər arasında birinci yerə layiq görüldülər.

Qüdrət Nuriyev vurğulayıb ki, Azərbaycan xalqı bu gün hər birimizin ürəyində böyük qürur hissi yaradan 44 günlük Vətən müharibəsində misilsiz qələbənin sevincini hədsiz fərəh hissi ilə yaşayır. Dillərdə dastan olan bu böyük Zəfərimizlə, nəinki Ermənistanın 20 faiz ərazilərimizin 30 illik işğalına son qoyduq, həmçinin dünyada qalib dövlət, qalib xalq kimi tanındıq. Azərbaycan Prezidentinin ətrafında dəmir yumruq kimi birləşən xalqımız misli olmayan həmrəylik nümayiş etdirərək cəmiyyətimizdə mövcud olan Xalq-Lider-Ordu birliyini daha yüksək səviyyəyə qaldırdı.

“Ümummilli Liderimizin müqəddəs siyasəti, Müzəffər Ali Baş Komandan İlham Əliyevin sarsılmaz iradəsi və ordumuzun gücü bizi ədalət uğrunda haqq savaşında qalibiyyətə çatdırdı. İdmançılarımız bir daha sübut edirlər ki, belə döyüşkən, pəhləvanlar yetirən ulu bir xalqın övladları məğlubedilməz olmalı, rəqib üzərində mərd-mərdanə qələbə çalmalıdırlar. Yurd, Vətən uğrunda, ölüm-dirim savaşında gözünü belə qırpmadan düşmənin üzərinə gedən, haqq savaşında qalib olan Azərbaycanın idmançıları da həmişə diqqət mərkəzindədirlər. İndiki bir vaxtda ölkəmizə hər bir sahədə, yalnız qələbə yaraşır”, - deyə Q. Nuriyev əlavə edib.