İQTİSADİYYAT
FERMERLƏR ƏMİNDİRLƏR Kİ, MÜŞTƏRİ AXTARMAQ ƏZAB-ƏZİYYƏTİNDƏN QURTARACAQLAR
Azərbaycanın torpaq adamları son illər onlara göstərilən dövlət qayğısı sayəsində istənilən məhsulu yetişdirə bilirlər. Lakin məhsulun artığını satmaq məsələsi həmişə onlar üçün müəyyən problem yaradır.
Uzun illər Bərdə rayonunda qabaqcıl təsərrüfatlardan birinə başçılıq etmiş, hazırda respublika Dövlət Torpaq və Xəritəçəkmə Komitəsi rayon şöbəsinin rəisi işləyən Həsən Həsənov AZƏRTAC-ın müxbiri ilə söhbətində demişdir ki, istehsalçı əziyyətlə əldə etdiyi məhsulu çox vaxt böyük xərclə bazara çatdırıb dəyər-dəyməzinə satmaq məcburiyyətində qalır. Halbuki vəziyyətdən çıxış yolu vardır. Bu gün rayonlarımızda keçmiş kolxoz və sovxozların, kəndkimya və ticarət təşkilatlarının çoxsaylı anbarları və digər tikililəri qalmaqdadır. İmkanlı adamlar bu tikililərə “əl gəzdirib” onları müasir taxıl, kartof, meyvə-tərəvəz anbarlarına çevirsələr istehsalçı məhsulunu müştəri tapmaq üçün iri şəhərlərə daşımaq əzab-əziyyətindən qurtarar, onu yerli tədarükçülərə satar. Xırda emal müəssisələri də kəndlini bazar qayğısından azad edərdi. Son vaxtlar sahibkarlığa dövlət səviyyəsində qayğı xeyli güclənmişdir. Torpaq adamları bunu alqışlayırlar və əmindirlər ki, onlar müştəri axtarmaq əzab-əziyyətindən də qurtaracaqlar.