Fevralın 11-i Beynəlxalq Təhlükəsiz İnternet Günüdür
Bakı, 11 fevral, AZƏRTAC
Hər ilin fevral ayında bir çox ölkədə ilin ikinci ayının ikinci tam həftəsinin ikinci günündə Təhlükəsiz İnternet Gününü (Safer Internet Day, SID) qeyd edilir.
AZƏRTAC xəbər verir ki, hər il Beynəlxalq Təhlükəsiz İnternet Gününün mövzusu müəyyən edilir. Bu, internet istifadəçilərinin qorunması və yeni proqramların həyata keçirilməsi sahəsində aktual məsələlərə aiddir. Bu il Beynəlxalq Təhlükəsiz İnternet Günü “Doğrucul olmaq çox yaxşıdır? Özünüzü və başqalarını onlayn fırıldaqlardan qoruyun” mövzusunda qeyd olunur.
Beynəlxalq Təhlükəsiz İnternet Günü internet istifadəçilərinin hər il qarşılaşdıqları onlayn problemləri və ya mövzuları vurğulayır. 2004-cü ildə Avropa Komissiyasının təşəbbüsü ilə təsis edilən bu əlamətdar gün dünyanın 170-dən çox ölkəsində, o cümlədən Azərbaycanda qeyd olunur. Onun məqsədi bütün dünyada uşaqlar və gənclər tərəfindən onlayn texnologiyalardan və mobil telefonlardan daha təhlükəsiz, məsuliyyətli istifadəni təşviq etməkdir.
İnternetin özü tərəqqinin və onun məntiqi mərhələsinin bir hissəsi olmaqla yanaşı, yeni kəşflər və inkişaflar üçün bir növ addımın vazkeçilməz amili olub. O, onlayn öyrənmədən tutmuş əyləncəyə qədər müxtəlif imkanlar təklif edir. Koronavirus pandemiyası zamanı internet ünsiyyət üçün əvəzsiz vasitəyə çevrilib, hətta bu gün də insanların dostları və ailələri ilə əlaqə saxlamasının əsas vasitələrindən biri olaraq qalır. Ancaq müsbət cəhətlərlə yanaşı, internetlə bağlı mənfi xüsusiyyətlər də var.
İnternetin bəşəriyyətin inkişafındakı nəhəng rolunu dərk edən bu əlamətdar günün qeyd edilməsinin təşəbbüskarları ictimaiyyətin diqqətini ümumdünya şəbəkəsinin insan həyatında mənfi rol oynayan tərəflərinə və xüsusiyyətlərinə yönəltməyə çalışıblar.
Beynəlxalq Təhlükəsiz İnternet Gününə həsr olunmuş tədbirlərin təşkilatçıları gənc nəslə və onun inkişafına cavabdeh olan yaşlı yaş qruplarının nümayəndələrinə bu qlobal informasiya şəbəkəsində insan əməyinin xüsusiyyətlərini izah etməyə çalışırlar. Onlar diqqəti ona yönəldirlər ki, bir növ informasiya bankı rolunu oynayan internetdən ağıllı şəkildə istifadə etmək, bu məlumat bazasından məhz axtardığınız bilikləri əldə etmək, lazımsızları süzgəcdən keçirmək, özünüzü və yaxınlarınızı ayrı-ayrı səhifələrin açıq-aşkar “zibilindən”, yalandan, antisosial və əxlaqsız məzmunlardan qorumaq lazımdır.
Təşkilatçılar, ilk növbədə, şüuru formalaşma mərhələsində olan və bəzən müqavimət göstərə bilməyən gənc nəsil üçün internetdə təhlükəsizlik problemindən narahat olublar.
Yeri gəlmişkən, “internet təhlükəsizliyi” anlayışı “kibertəhlükəsizlik” və “kompüter təhlükəsizliyi” kimi daha geniş anlayışların bir hissəsidir, brauzer və şəbəkə təhlükəsizliyini, həmçinin onlayn rejimdə olarkən düzgün davranışı ehtiva edir.
Qeyd edək ki, ötən gün Azərbaycanın Rəqəmsal İnkişaf və Nəqliyyat Nazirliyinin rəhbərlik etdiyi Biznes Mühiti və Beynəlxalq Reytinqlər Komissiyasının internet bağlantısı və internet infrastrukturu üzrə işçi qrupunun növbəti iclası baş tutub.
İclasda Dünya Bankının “Group Business Ready” hesabatının “Kommunal xidmətlər (İnternet)” göstəricisi ilə bağlı müvafiq sahədə təkmilləşdirmə və kommunikasiyanın həyata keçirilməsi üzrə 2024-cü il üçün Yol Xəritəsi çərçivəsində görülmüş işlər müzakirə edilib, 2025-ci il üçün qarşıda duran vəzifələr müəyyən olunub.
Bölmənin digər xəbərləri
