FRANS-PRESS AGENTLİYİNİN PREZİDENTİ VƏZİFƏSİNƏ ÜÇ NAMİZƏD GÖSTƏRİLMİŞDİR

06.12.2005 [15:19]
Çap et
A⁺ A^-

AZƏRTAC-ın xüsusi müxbiri xəbər verir ki, Frans-Press Agentliyinin prezidenti Bertran Eveno öz vəzifəsindən istefa verdikdən sonra boş qalmış yeri tutmaq üçün üç nəfər namizədliyini irəli sürmüşdür. Agentliyin rəhbər şurası Pyer Luetin, Ksavye Ellinin və Bernar Markunun namizədliyinin qeydə alındığını bəyan etmişdir.

42 yaşlı Pyer Luet 2003-cü ildən agentliyin baş direktorudur. Fransa televiziyasına başçılıq etməzdən əvvəl 1993-1995-ci illərdə ölkənin baş naziri Eduard Baladurun kabinetinin üzvü olmuş, 2000-ci ildə Zebankın nəzarət şurasının vitse-prezidenti vəzifəsində çalışmışdır.

58 yaşlı Ksavye Elli sokpress qrupunun direktor müavini olmuş və 2005-ci ildə bu vəzifəni tərk etmişdir. Uzun müddət Paris Mətbuat İşçiləri Həmkarlar İttifaqı Təşkilatının sədri olmuşdur.

57 yaşlı Bernar Marku 1983-2002-ci illərdə agentliyin aparıcı jurnalistlərindən biri olmuşdur.

Dekabr ayının birinci yarısında onlardan biri agentliyin prezidenti vəzifəsinə seçiləcəkdir. Mətbuat aləmində Pyer Luetin şanslı olduğu bildirilir.