Fransada ən uzunömürlü azərbaycanlının doğum günü qeyd olunmuşdur
Paris, 10 oktyabr (AZƏRTAC). Azərbaycanın Fransadakı səfirliyində bu ölkədə yaşayan soydaşlarımızın ən yaşlı nümayəndəsi Qədir Süleymanın 96 yaşı təntənəli şəkildə qeyd olunmuşdur
Səfir Elçin Əmirbəyov Q. Süleymanı 96 illiyi münasibətilə təbrik edərək bildirmişdir ki, soydaşımızın doğum günü çox əlamətdar bir vaxta təsadüf etmişdir. Oktyabrın 9-da ölkəmizdə keçirilən prezident seçkiləri xalqımızın böyük ruh yüksəkliyi və fəallığı şəraitində başa çatmış, dövlətimizin başçısı İlham Əliyev inamlı qələbə qazanaraq yenidən Prezident seçilmişdir.
Q. Süleymanın doğum gününün azərbaycanlılar arasında keçirilməsinə xüsusi önəm verildiyini diqqətə çatdıran səfir qəlbi ilə doğma Azərbaycana bağlı olan bu insanın yaşının ahıl dövrünə baxmayaraq həmişə ölkəmizlə bağlı tədbirlərə qatıldığını və xüsusi fəallıq göstərdiyini bəyan etmişdir.
Sonda E. Əmirbəyov 96 yaşı tamam olan soydaşımıza xatirə hədiyyəsi təqdim etmişdir.
Qədir Süleyman belə səmimi qarşılandığına və hədiyyəyə görə öz təşəkkürünü bildirmişdir.
Əslən Qərbi Azərbaycandan olan Qədir Süleyman (Süleymanov) 1917-ci il oktyabrın 10-da anadan olmuş, 23 yaşında müharibəyə getmişdir. Müharibədə yaralanaraq əsir düşən Qədir Süleyman Stalin repressiyasından ehtiyat edərək qələbədən sonra Azərbaycana qayıtmamış və Fransanı özünə ikinci Vətən seçmişdir.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
