Fransada etirazlar zamanı zorakılıqlardan sonra Marin Lö Pen hökuməti tənqid edib
Paris, 19 oktyabr, AZƏRTAC
Fransada oktyabrın 17-də sosial etirazlar zamanı baş verən zorakılıqlardan sonra Milli Birlik (RN) partiyası hökuməti və daxili işlər naziri Loran Nünezi tənqid edib.
AZƏRTAC xəbər verir ki, ifrat sağçıların lideri Marin Lö Pen Milli Birliyin tərəfdarlarının gözlənilən siyasi qazancını birbaşa şərh etməsə də, xalqa müraciətində sakitliyə, ləyaqətə və respublika prinsiplərinə uyğun təmkinə çağırıb. O, Emmanuel Makronu ölkədə yaranmış gərginliyin məsuliyyətini daşıyan şəxslərdən biri kimi göstərərək, hakimiyyəti xalqın narazılığını dinləməməkdə ittiham edib.
Mərkəzçi və sağçı siyasi qüvvələr baş verənlərə görə Əyilməz Fransa (LFI) partiyasının lideri Jan-Lük Melanşonu günahlandırdığı halda, RN hökumətin fəaliyyətini və daxili işlər naziri Loran Nünezi tənqid edib. Partiyanın sözçüləri nazirin asayişin qorunması strategiyasını və təhlükəsizlik qüvvələrinə ayrılan resursları yetərsiz hesab ediblər.
RN deputatı Jan-Filip Tangi hökumətin qarşıdan gələn etirazların dinc şəraitdə keçirilməsini təmin etmək üçün kifayət qədər imkanlara malik olduğunu bildirib. Partiya noyabrın 5-nə planlaşdırılan nümayişlərin qadağan edilməsinə qarşı çıxır.
Marin Lö Pen çıxışında hakimiyyətin və təhlükəsizliyin bərpasını vəd edərək, ölkə üçün başqa yol təklif etdiyini bildirib. RN təmsilçiləri isə ictimai asayişin təmin olunması üçün sərt tədbirlərin görülməsinin vacibliyini vurğulayıblar.
Bununla belə, Lö Penin milli barışığa çağırışları partiyanın bəzi nümayəndələrinin sərt ritorikası ilə ziddiyyət təşkil edir. RN-nin zorakılıq hadisələrindən hökumətin nüfuzunu zəiflətmək və özünü ictimai asayişi təmin edə biləcək siyasi qüvvə kimi göstərmək üçün istifadə etməyə çalışdığı bildirilir.
Bölmənin digər xəbərləri
