FRANSADA YANĞINDAN 2 NƏFƏR ÖLMÜŞ, 36 NƏFƏR XƏSARƏT ALMIŞDIR

24.05.2004 [13:57]
Çap et
A⁺ A^-

Fransanın Kalvados bölgəsində yerləşən Lizyö şəhərinin mərkəzindəki mehmanxanaların birində baş vermiş yanğın nəticəsində 15 yaşlı alman turisti və 1 nəfər yanğınsöndürən həlak olmuşdur. Yanğın zamanı mehmanxanada 60 nəfər müsafir olmuşdur. Onlardan 6 nəfər ağır, 30 nəfər isə müxtəlif dərəcəli yüngül bədən xəsarəti almış və yaxınlıqdakı xəstəxanalarda yerləşdirilmişdir.

Yanğınsöndürənlər hadisə yerinə çatanda alov artıq beşmərtəbəli mehmanxananı bürümüş, birinci və ikinci mərtəbələr tamamilə yanmışdır. İçəridə qalmış alman turistini xilas etmək istəyən 47 yaşlı yanğınsöndürən onunla birlikdə yanmışdır. Müxtəlif mərtəbələrdə qalmış 26 nəfəri isə xilas etmək mümkün olmuşdur.

Yanğının siqaretdən baş verməsi ilkin ehtimal kimi irəli sürülmüşdür. Bununla belə, hadisənin səbəblərini aydınlaşdırmaq üçün təhqiqat aparılır.