Fransanın internet portalında Azərbaycanın turizm imkanlarından bəhs edən məqalə yerləşdirilmişdir
Paris, 19 aprel (AZƏRTAC). Fransanın www.petitfute.com internet portalında Azərbaycanın turizm imkanlarından bəhs edən “Azərbaycanın turist soraq kitabçası” başlıqlı məqalə yerləşdirilmişdir.
Məqalədə Azərbaycanın qədim İpək yolunun üzərində, Şərq ilə Qərbin qovuşuğunda yerləşdiyi bildirilir.
Müəllif yazır: “Azərbaycanla bağlı fransız dilində bələdçi kitabçası elə tərtib olunmuşdur ki, bu ölkəyə səyahət edənlər heç bir çətinlik çəkmədən onun tarixi, mədəniyyəti və mədəni dəyərləri ilə yaxından tanış olmaq imkanı əldə edə bilsinlər. Kitabçadakı 200 başlıq altında verilən yazılarda ölkə barədə hərtərəfli məlumatlar yerləşdirilmişdir”.
“Azərbaycana xoş gəlmişsiniz” sərlövhəli yazıda XIX əsrin sonları və XX əsrin əvvəllərində neft sənayesinin inkişafı sayəsində paytaxt Bakıda mühüm quruculuq işlərinin aparıldığı, Avropa tipli yeni binaların inşa edilməsi haqda fransız oxucularına ətraflı məlumat verilir.
Bakı şəhərinin Xəzər dənizinin sahilində yerləşdiyi diqqətə çatdırılan məqalədə son vaxtlar paytaxtda dünyada analoqu olmayan möhtəşəm binaların tikildiyi, bərpa işlərindən sonra daha da yaraşıqlı olan dənizkənarı bulvarın sakinlərin sevimli istirahət guşəsinə çevrildiyi, müasir tipli çimərliklərdə turistlərin istirahəti üçün hər cür şəraitin yaradıldığı, turizm imkanlarının genişləndiyi və ölkəmizlə daha yaxından tanış olmaq üçün müxtəlif marşrutlar tərtib edildiyi bildirilir.
Yazıda Ermənistan-Azərbaycan, Dağlıq Qarabağ münaqişəsi nəticəsində ərazilərimizin 20 faizinin erməni silahlı qüvvələri tərəfindən işğal edildiyi, tarixi abidələrlə zəngin Naxçıvanın erməni blokadasında olduğu qeyd edilir.
Fransız oxucularına, xüsusilə turistlərə dəniz və dağlar ölkəsi kimi tanınan Azərbaycanın ərazisi, dövlət quruluşu, əhalisinin sayı və tərkibi, dövlət dili, dini etiqadı, pul vahidi, iqtisadiyyatı, siyasəti, iqlim şəraiti, incəsənəti, muğamı, zəngin milli mətbəxi, mehmanxanaları, tarixi abidələri barədə geniş məlumat verilir.
Azərbaycanda ipəyin 4500 il bundan əvvəl istehsal olunduğu diqqətə çatdırılan məqalədə xalçaçılıq, misgərlik və dulusçuluq kimi sənətlərin də qədim dövrlərə təsadüf etdiyi, şərabçılığın 7 min ildən artıq yaşı olduğu bildirilir, zərdüştlüyün tarixindən, Şəki, Gəncə, Quba, Lənkəran və digər şəhərlərdən bəhs edilir.
Soraq kitabçası fransızların ölkəmiz haqqında ətraflı məlumata malik olması və onların turist səfərləri etməsi baxımından mühüm əhəmiyyət daşıyır.
Portalda ölkəmizin turizm imkanlarını əks etdirən çoxsaylı şəkillər də yer almışdır.
Məqalənin tam mətni ilə www.petitfute.com/p154-azerbaidjan/guide-touristique internet resursunda tanış olmaq mümkündür.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
