GƏLƏN İL DİASPOR QURUCULUĞU SAHƏSİNDƏ BİR SIRA İRİMİQYASLI TƏDBİRLƏR KEÇİRİLƏCƏK
Komitənin sədri Nazim İbrahimov demişdir ki, Prezident İlham Əliyevin sentyabrın 18-19-da Türkiyənin Antalya şəhərində keçirilmiş Türkdilli dövlətlərin və topluluqların 10-cu dostluq, qardaşlıq və əməkdaşlıq Qurultayındakı nitqindən irəli gələn tövsiyələrə uyğun olaraq, Dövlət Komitəsi Azərbaycan və türk diaspor təşkilatlarının I Forumunun keçirilməsi ilə bağlı hazırlıq işlərinə başlamışdır. Forumda Azərbaycan və türk diaspor təşkilatları arasında əməkdaşlığın inkişaf etdirilməsi yolları, mədəniyyət, təbliğat və digər sahələrlə bağlı ortaq layihələrin həyata keçirilməsi prosesinin sürətləndirilməsi və digər məsələlərin müzakirəsi planlaşdırılır.
Diaspora fəaliyyətini daha təkmil və sistemli şəkildə əlaqələndirmək, Azərbaycan və türk diaspor təşkilatları arasında əməkdaşlığın əsas prinsip və istiqamətlərini müəyyənləşdirəcək proqram layihəsi də Forumda müzakirə ediləcəkdir.
Bundan başqa, toplantıda Türk Dünyası Gənclik Qurultayının təşkili ilə bağlı məsələnin müzakirəyə çıxarılması, Forum iştirakçılarını Azərbaycanda gedən sosial-iqtisadi inkişaf prosesləri ilə daha yaxından tanış etmək məqsədi ilə respublikanın müxtəlif rayonlarına səfərlərin təşkili planlaşdırılır.
N.İbrahimov qeyd etmişdir ki, türk dünyasının birliyinə nail olmaqla biz kiminsə əleyhinə deyilik. Əksinə biz hamının yanında olmaq istəyirik. Ona görə də Azərbaycan və türk diasporlarının birləşərək vahid gücə çevrilməsi başqa xalqlarda qısqanclıqla qarşılanmamalıdır.
Dövlət Komitəsinin sədri müxtəlif ölkələrdə, xüsusən də Rusiyada azərbaycanlılarla bağlı yaranan problemlərə də toxunub və bu cür məsələlərin siyasiləşdirilməsinin əleyhinə olduğunu bildirib.
N.İbrahimov 2007-ci ildə bir sıra irimiqyaslı tədbirlərin keçiriləcəyini və bunun üçün dövlət büdcəsindən kifayət qədər vəsait ayrıldığını vurğulayıb. Gələn il keçiriləcək tədbirlər sırasına Bakıda Azərbaycan-türk diaspor təşkilatlarının I Forumu, Dünya Azərbaycanlıları Alimlərinin I Forumu, dünyada yaşayan Azərbaycan əsilli jurnalistlərin I Forumu, Avropa ölkələrindən birində Avropa Azərbaycanlıları Konqresinin (AAK) ikinci qurultayı, ABŞ-da Amerika-Azərbaycan Assosiasiyaları Assambleyasının təsis konfransı və digərləri daxildir. 2008-ci ildə isə Bakıda Türkdilli dövlətlərin və topluluqların 11-ci dostluq, qardaşlıq və əməkdaşlıq Qurultayı keçiriləcəkdir.
Sonra Nazim İbrahimov xarici ölkələrdəki Azərbaycan diaspor təşkilatlarının, icmaların fəaliyyətləri barədə məlumat vermiş, jurnalistləri maraqlandıran sualları cavablandırmışdır.
Bölmənin digər xəbərləri
