Gəncə Şəhər İcra Hakimiyyətinin başçısı Eldar Əzizov geniş nitq söylədi, respublikamızda ilk dəfə qeyd olunan Şəhər gününün keçirilməsini əlamətdar hadisə kimi qiymətləndirdi və bu münasibətlə ölkəmizin başçısı İlham Əliyevin gəncəlilərə təbrikini çatdırdı.

Sonra Gəncə Dövlət Universitetinin rektoru, professor Mübariz Yusifov

dedi ki, aparılan elmi tədqiqatlar Gəncənin 2500 yaşı olduğunu sübut etmişdir. Qədim Gəncənin inkişafına göstərdiyi diqqət və qayğıya görə Prezidenti İlham Əliyevə minnətdarlığını bildirən rektor, belə bayramların əhəmiyyətini xüsusi vurğuladı.

Yeni Azərbaycan Partiyası Gəncə şəhər təşkilatı gənclər birliyinin üzvü Namiq İmanquliyev, ölkəmizdə və eləcə də Gəncədə aparılan böyük quruculuq işlərindən danışdı, müstəqil respublikamızın iqtisadi qüdrətinin artırılmasında gənclərə böyük imkanlar açıldığını iftixar hissi ilə qeyd etdi və şəhər gəncləri adından respublikamızın Prezidentinə minnətdarlığını bildirdi.

Rusiya Federasiyasının və Gürcüstanın Azərbaycandakı səfirləri Vasili İstratov və Zurab Qumberidze mitinqdə çıxış edərək, belə bir möhtəşəm tədbirdə iştirakdan məmnun qaldıqlarını bildirdilər və gəncəliləri əlamətdar yubiley münasibətilə təbrik etdilər.

Sonra musiqi sədaları altında Azərbaycanın dövlət bayrağı meydana gətirildi. Respublikamızın dövlət himni səsləndirildikdən sonra hərbçilər və süvarilər Azərbaycanın və Gəncənin gerbləri əks olunmuş monumentin qarşısından keçdilər, əsgərlər yaylım atəşi açdılar.

Rəsmi hissənin sonunda şəhər ictimaiyyəti nümayəndələrinin Azərbaycan Prezidenti İlham Əliyevə müraciəti oxundu. Müraciətdə deyilir:

“Möhtərəm cənab Prezident!

Biz, Gəncə şəhərinin 2500 illiyi münasibətilə ümumşəhər miqyasında keçirilən bayram tədbirinin iştirakçıları gündən-günə inkişaf edən, möhkəmlənən müstəqil Azərbaycanda sabitliyin, təhlükəsizliyin təmin olunmasında xidmətlərinizi yüksək qiymətləndirir, xalqımızın xoşbəxt və firavan gələcəyi naminə apardığınız ardıcıl və məqsədyönlü fəaliyyətinizdə Sizə uğurlar arzulayırıq.

Fərəh hissi ilə bildiririk ki, məhz Azərbaycan xalqının böyük oğlu, ümummilli lider Heydər Əliyevin müdrik siyasəti nəticəsində müstəqilliyimiz qorunub saxlanılmış, möhkəmlənmiş, torpaqlarımıza yönələn təcavüzün qarşısı alınmış, haqq işimizin dünya ictimaiyyətinə çatdırılması yolunda prinsipial və qətiyyətli addımlar atılmış, həyatımızın bütün sahələrində əsaslı islahatlara başlanmış, hüquqi, demokratik dövlət quruculuğu yolunda inamla addımlayan Azərbaycanın daha böyük nailiyyətlər əldə etməsinə zəmin yaranmışdır. Doğma Azərbaycanın qədim diyarlarından biri olan Gəncənin sakinləri ümummilli lider Heydər Əliyevin fədakarcasına həyata keçirdiyi möhtəşəm quruculuq işlərini unutmur, Nizami yurduna bütün səfərlərini böyük ehtiramla yad edirlər.

Ulu öndərimizin Gəncəyə hər gəlişinin növbəti inkişaf və tərəqqiyə zəmin yaratdığını böyük sevgi ilə xatırlayan qədirbilən gəncəlilər həmin dövrdə neçə-neçə nəhəng müəssisələrin, istehsal sahələrinin, təhsil, mədəniyyət, idman və s. obyektlərin istifadəyə verilməsinin şahididirlər.

Biz çox şadıq ki, ümummilli liderimizin müəyyənləşdirdiyi siyasi xətti və iqtisadi inkişaf strategiyasını Siz böyük uğurla və ləyaqətlə davam etdirirsiniz.

Möhtərəm cənab Prezident!

Bu gün ölkəmizdə böyük vüsət almış abadlıq işlərinin davam etməsi, Heydər Əliyev adına Bakı-Tbilisi-Ceyhan əsas neft ixrac boru kəmərinin işə düşməsi, yeni sosial obyektlərin tikintisi, məktəblərin, xəstəxanaların təmiri, yeni iş yerlərinin yaradılması, Sizin bilavasitə rəhbərliyiniz sayəsində hazırlanmış “Azərbaycan Respublikası regionlarının sosial-iqtisadi inkişafı Dövlət Proqramı”nın uğurla həyata keçirilməsi, bunun bariz nümunəsi olaraq qədim Gəncədə müasir hava limanının, müalicə-diaqnostika mərkəzinin, 21 nömrəli məktəbin inşa edilməsi, 37 və 39 nömrəli məktəblərin əsaslı təmiri gəncəlilərin ürəyindən xəbər verir və bu möhtəşəm işlərə görə Sizə minnətdarıq.

İnkişaf və tərəqqi yolunda olan qədim Gəncə bu gün öz simasını yaxşılığa doğru dəyişir, müasirləşir, onun küçə və meydanları, park və xiyabanları əsaslı təmir olunur. Bütün bu işlərlə bərabər, milli mənəvi dəyərlərimizdən olan tarix və mədəniyyət abidələrimizə də qayğı artırılır. Bunun bariz nümunəsidir ki, Sizin tövsiyə və tapşırığınız, Heydər Əliyev Fondunun yaxından köməyi ilə şəhərimizdə 11 məscid və Nizami Gəncəvinin məqbərəsi əsaslı təmir olunmuş, Heydər Əliyev xatirə muzeyi, Cavad xan məqbərəsi, Comərdi Qəssab türbəsi inşa edilmiş, ümummilli liderimizin adını daşıyan meydanda onun əzəmətli abidəsi ucaldılmış, musiqili fəvvarə quraşdırılmışdır.

Tarixi görkəmini saxlamaqla müasirləşən Gəncədə yeni çoxmərtəbəli yaşayış binalarının tikintisi, “Şir”, “Günəş” abidələrinin, Gəncə şəhərinin gerbi əks olunmuş monumentin yaradılması, yaşıllıqların salınması, Yeni Gəncə qəsəbəsində ticarət mərkəzinin inşası istiqamətində görülən tədbirlər şəhərimizdə quruculuq işlərinin uğurla davam etdiyini göstərir.

Möhtərəm Cənab Prezident!

Bütün xalqımız kimi, gəncəlilər də Sizin əzmlə həyata keçirdiyiniz uzaqgörən daxili və xarici siyasəti ürəkdən dəstəkləyir, qədim Gəncəyə göstərdiyiniz əvəzsiz qayğıya görə dərin təşəkkürünü bildirir, Azərbaycanın xoşbəxt gələcəyi naminə dəyərli fəaliyyətinizdə yeni-yeni uğurlar arzulayırlar”.

X X X

Sonra yubiley tədbirləri şəhərin ümummilli liderimiz Heydər Əliyevin adını daşıyan mərkəzi meydanında davam etdirildi. On minlərlə gəncəli və qonaqlar burada folklor kollektivlərinin çıxışlarına, rəssamların qədim Gəncənin mənzərələrini əks etdirən əsərlərdən ibarət sərgiyə, sirk ustalarının maraqlı nömrələrinə, kəndirbazların və idmançıların nümunəvi çıxışlarına baxdılar. Musiqi kollektivlərinin, rəqs qruplarının çıxışları da tədbir iştirakçılarına sevinc bəxş etdi.

Axşam isə meydanda daha böyük bayram sevinci yaşandı. AzTV-nin Gəncə Şəhər İcra Hakimiyyəti ilə birgə təşkil etdiyi bayram konsertində respublikamızın tanınmış incəsənət ustaları, müğənnilər yubiley tədbirinin iştirakçılarına böyük ovqat bəxş etdilər. Konsertdən sonra bayram atəşfəşanlığı oldu.